काठमाडौं । सिता रानामगरको अलराउन्ड प्रदर्शनप्रेरित नेपाली राष्ट्रिय महिला क्रिकेट टोलीले थाइल्यान्ड वुमन ट्वान्टी–२० स्म्यासमा फाइनल प्रवेशका लागि शुक्रबार इन्डोनेसियाबिरुद्ध खेल्दैछ ।
अलराउन्ड प्रदर्शन गरेकी सिताले बलिङमा नेपालबाट सबैभन्दा ६ विकेट लिइसकेकी छिन् भने ब्याटिङमा पनि नेपालबाट सबेभन्दा धेरै ७७ रन बनाइसकेकी छन् । प्रतियोगितामा धेरै रन बनाउनेमा उनी पाँचौं नम्बरमा छन् । तथापी समूह चरणमा नेपालले जितका लागि खासै ठुला संघर्ष गर्नु परेन ।
प्रतियोगितामा सतप्रतिशत नतिजा निकालेको नेपालले समूह ‘ए’ मा कठिन प्रतिस्पर्धा गर्नु परेको छैन । समूहको अन्तिम खेलमा आयोजक थाइल्यान्ड ‘ए’ टिमलाई ९ विकेटले पराजित गरेको नेपालले समूहको पहिलो खेलमा चीनलाई १० विकेटले पराजित गरेको थियो । दोस्रो खेलमा मलेसियालाई ६ विकेटले पराजित गरेको नेपालले तेस्रो खेलमा युनाइटेड अरब इमिरेट्स (युएई)लाई पनि ६ विकेटले हराएको थियो । नेपालले यूएईलाई हराउन अन्तिम ओभरसम्म खेल्नुपरेको थियो । त्यसबाहेक नेपालले अन्य खेलमा जितका लागि संघर्ष गर्नु परेको छैन ।
यूएई समूह ‘ए’ को उपविजेता टोली हो ।
दुई वर्षपछि अन्तर्राष्ट्रिय प्रतियोगितामा पूनरागमन गरे पनि नेपाली टोलीकी कप्तान रुविना क्षेत्रीले उपाधि जित्ने लक्ष्य रहेको बताएकी थिइन् । नेपाली टोली उपाधिबाट अब दुई खेलमात्र टाढा छ । इन्डोनेसिया समूह ‘बी’ को उपविजेता टोली हो । आयोजक थाइल्यान्डबाहेक इन्डोनेसियाले समूह चरणमा सबै खेल जितेको थियो । त्यसैले शुक्रबार बैंककस्थित टे«डथाइ क्रिकेट मैदानमा नेपाली टोलीको परिक्षा हुने अनुमान गरिएको छ ।
इन्डोनेसियाकी युलिया एनग्राइनीले ४ खेलमा ७५ रन बनाइसकेकी छिन् । भने नी मेड पुत्री सुवानदेबीले ३ इनिङमा ६ विकेट लिइसकेकी छन् ।
थााइल्याण्डको जानुअघि नेपाली टोलीकी कप्तान रुबिनाले उपाधि खडेरी मेटाउने बताएकी थिइन् । कप्तानले भनेजस्तै नेपालले समूह चरणमा उत्कृष्ट प्रदर्शन गरेको छ ।
यस प्रतियोगितालगत्तै नेपालले थाइल्याण्डमै आयोजना हुने आइसीसी ट्वान्टी–२० बिश्वकप छनोट प्रतियोगिता खेल्नेछ । अभिभावक संस्था नेपाल क्रिकेट संघ (क्यान) निलम्बनमा रहेका बेला अन्तराष्ट्रिय क्रिकेट परिषद (आइसीसी)ले महिला क्रिकेट टोलीलाई यो अवसर दिएको हो ।
