हरिद्वार । भारतमा एक महिलाले नेपालबाट आफ्ना पतिले फोनबाटै ‘ट्रिपल तलाक’ दिएको भन्दै भारतीय प्रहरीलाई उजुरी गरेकी छन् । आफ्नो माइती पक्षले दाइजोको माग गरेकोमा दिन नसकेपछि यो अवस्था आएको उनले उजुरीमा उल्लेख गरेकी छन् । हरिद्वार प्रहरी कार्यालयमा त्यसबारेमा लिखित उजुरी परेको र त्यसबारेमा अनुसन्धान शुरु भएको समाचारमा जनाइएको छ ।
ती महिलाका अनुसार उनका पति चार महिनाअघि नेपाल गएका थिए । र, उनले गएको बुधबार बिहान पत्नीलाई फोनबाटै तलाकको घोषणा गरेका थिए । पछिल्लो पटक ट्रिपल तलाकका बारेमा हरिद्वार प्रहरीमा परेको यो चौथो उजुरी भएको प्रहरीले जनाएको छ । ती मध्ये तीन वटा जवलपुर क्षेत्रबाट नै उजुरी परेका छन् ।
ती महिलाका अनुसार साउद अन्सारी नामका युवकसँग उनले दुई वर्ष अघि विवाह गरेकोमा सधैं दाइजोको विषयलाई लिएर झगडा गर्ने गरेका थिए ।
पछि उनी चार महिना अघि नेपाल गएका हुन् । उनका घरका मान्छेले गएको महिना ती महिलालाई माइतमा लगेर छोडेका थिए । प्रहरीले सो घटनाबारेमा आफ्नो महिला सेललाई जानकारी गराएको बताइएको छ । मुश्लिम समुदायमा फोन वा मेसेज वा भेटेर नै पुरुषले तीन पटक तलाक भनेपछि सम्बन्ध विच्छेद हुने प्रचलन रहेकोमा भारतको संसदले केही अघि मात्रै यसलाई अवैध घोषणा गरेको छ । (टाइम्स अफ इण्डिया)
