काठमाडौं । भदौमा चलचित्रको सुटिङ् थियो । टोखामा । चलचित्रका कलाकारसहितका क्रू मेम्बरहरु टोखामै थिए । गोपीले पालेको गाई कहिले ब्याउँछ भन्ने प्रतिक्षा थियो उनीहरुलाई । आज–भोली–पर्सी भन्दै पर्खिँदापर्खिँदा भेटेनरी डाक्टरले दिएको समय नजिकियो । गाई साँझ विहान भयो । क्यामेरा मेन गाई ब्याएको भिडियो खिच्न तयार भए ।
गाई त ब्यायो तर राति । न गोपीले थाहा पाए न त क्यामेरा मेनले नै । “हामीलाई गाई ब्याएको सिन चाहिएको थियो । हामी दुई तीन दिन देखिनै कुरेर बसिरहेका थियौं । भेटेनरी डाक्टरले गाई बियाउने समय दिएका थिए । त्यही समयलाई हामीले फलो गरिरहेका थियौं,” चलचित्रका गोपी अर्थात विपिन कार्कीले भने, “तर डेटभन्दा एक दुई दिन तलमाथि हुँदोरहेछ । अबेर साँझसम्म बसेर आज ब्याउँदैन भनेर क्रू मेम्बरसहित हामी फर्कियौं तर त्यही रात गाई ब्याएछ ।”
चलचित्र ‘गोपी’को सुटिङ नै प्रभावित पारिदियो गाईले । अर्को कसको गाई कहिले ब्याउँछ भनेर कुर्नुपर्ने भयो । गाई मात्रै चलचित्रमा अर्को देखाउनु पर्ने भएन । अर्को गाईको खोजीसँगै समय लम्बियो ।
तर, लोकेशन टोखा भएकाले ब्याउने गाईको अभाव भने भएन । मात्रै समयको कुरा थियो । सुरुमा झोरमा सुटिङ गरिरहेको चलचित्र युनिट अर्को गाई खोन्दै द्वारिका निलकण्ठ फर्म पुग्यो । जुन पहिलोको तुलनामा निकै ठूलो थियो ।
“सुटिङ सुरु भएको केही पहिलो हप्तामै गाई ब्याएको सिन लिने तयारी गरेका हामीलाई २९ औं दिनसम्म कुर्नुपर्यो,” विपिनले सुनाए, “धन्न ब्याएको गाई चलचित्रको क्यारेक्टर गाई नभएकाले हामीलाई सजिलो भयो । अन्यथा ठूलो हैरानी खेप्नुपर्ने थियो ।” ‘गोपी’मा क्यारेक्टर गाईका रुपमा गौरीलाई राखिएको छ ।
माघ १८ बाट प्रदर्शनमा आउने चलचित्रमा विपिन र वर्षाका अलावा सुरक्षा पन्त, प्रकाश घिमिरे, भोला सापकोटा, अंकित खड्का आदिको अभिनय छ । दीपेन्द्र लामाको कथा तथा निर्देशन रहेको चलचित्रलाई सामीप्यराज तिमल्सेनाले लेखेका हुन् ।
