काठमाडौं । बहुमूल्य धातु सुनको भाउमा सामान्य गिरावट आएको छ । नेपाल सुनचाँदी व्यवसायी महासंघले आज मंगलबार कालागि छापावाल सुनको भाउ तोलाको ६० हजार ७ सय रुपैयाँ तोकेको छ । यो हिजो सोमबारको दाँजोमा २ सय रुपैयाँले कम हो ।
महासंघका अनुसार छापावाल सुन पछिल्ला चार दिन तोलाको ६१ हजार रुपैयाँमा स्थिर रहेपछि आइतबार २ सय घटेर ६० हजार ८ सयमा कारोबार भएको थियो । त्यसपछि सोमबार १ सयले बढेर ६० हजार ९ सय पुगेको थियो ।
यसअघि नेपालमा सुन सर्वाधिक महँगो हुँदा तोलाको ६२ हजार ५ सयसम्म पुगेको रेकर्ड छ । अमेरिकी अर्थतन्त्र खस्किँदै जानु, अमेरिकी डलर अन्तर्राष्ट्रिय बजारमा कमजोर हुँदै जानुलगायत कारण सुनको भाउ उच्च भएको थियो ।
भारतको अर्थतन्त्र पनि ओरालो लागेका कारण भारतीय रुपैयाँ (भारु) डलरको दाँजोमा कमजोर हुँदै जाँदा सुनको भाउ बढ्न थप बल पुगेको थियो । स्थानीय बजारमा डलर भाउ बढेको देखिए पनि अन्तर्राष्ट्रिय बजारमा खस्किएको छ र यसैको प्रभाव सुनको भाउ वृद्धिमा परेको महासंघको भनाइ छ ।
हाल मुलुकमा दैनिक २० किलोबराबर सुन बिक्री हुने गरेको छ । सुनचाँदी व्यवसायीले नेपाल राष्ट्र बैंक वा उसले तोकेका अन्य ‘क’ वर्गका वाणिज्य बैंकबाट दैनिक २० किलोसम्म सुन खरिद गर्न पाउँछन् ।
त्यसैगरी तेजाबी सुनको भाउ पनि २ सयले घटेर तोलाको ६० हजार ४ सय रुपैयाँ कायम भएको छ । हिजो सोमबार ६० हजार ६ सय र आइतबार ६० हजार ५ सयमा अडेको भाउ त्यसअघि चार दिन लगातार तोलाको ६० हजार ७ सयमा कारोबार भएको थियो । चाँदीको भाउ आज ५ रुपैयाँ घटेर तोलाको ७ सय ५० मा कारोबार भइरहेको छ । पछिल्ला चार दिन तोलाको ७ सय ६५ मा कारोबार भएपछि आइतबार र सोमबार १० रुपैयाँ घटेर ७ सय ५५ कायम भएको थियो ।
महासंघका अनुसार माघ ८ (आज) सम्मको मूल्यसूची हेर्दा छापावाल सुनको भाउ माघ १, २, ३ र ४ मा ६१ हजार, ६ मा ६० हजार ८ सय र ७ मा ६० हजार ९ सय रुपैयाँ थियो ।