एजेन्सी । पूर्व विजेता राफेल नाडालले मंगलबार मेलबर्न पार्कमा २१ वर्षे फ्रान्सेस टिएफोईलाई ३–० को साझो सेटमा हराउँदै अस्ट्रेलियन ओपनको अन्तिम चारमा स्थान बनाएका छन् । स्पेनका नाडाल अस्ट्रेलियन ओपनको सेमिफाइनलमा स्थान बनाएको यो छैटौं पटक हो ।
१७औं पटकका ग्रान्डस्लाम विजेता नाडालले टिएफोइलाई ६–३, ६–४, ६–२ को सेटमा पराजित गरेका थिए । २००९ का विजेता नाडाललाई अमेरिकाका २१ वर्षे टिएफोईलाइ हराउँन १ घन्टा ४७ मिनेट लाग्यो । नाडालले अब फाइनलका लागि स्टेफानोस टिसिटिसिपससँग प्रतिस्पर्धा गर्नेछन् । ग्रिसका २० वर्षे टिसिटिसिपसले स्पेनका रोबेर्टो बाउटिस्टा अगुटलाई ३–१ को सेटमा हराउँदै अन्तिम चारमा स्थान बनाएका हुन् । टिसिटिसिपसले चौथो चरणमा तेस्रो वरियाताका रोजर फेडेररलाई ३–१ कै सेटमा पराजित गर्दै क्वार्टरफाइनलमा स्थान बनाएका थिए ।
महिलातर्फ अमेरिकाकी ड्यानिल कोलिन्स र चेक गणतन्त्रकी पेत्रा केभितोभाले अन्तिम चारमा स्थान बनाएका छन् । कोलिन्सले रुसकी एनास्तासिया पाभलेउचेनकोभालाई २–१ को सेटमा हराएकी हुन् । आठौं वरियाताकी केभितोभाले अस्ट्रेलियाकी २२ वर्षिया एशलेघ बार्टेलाई ६–१, ६–४ को सेटमा हराउँदै अन्तिम चारमा स्थान बनाएकी हुन् ।