काठमाडौं । प्रतिपक्षको अवरोधका बीच पनि चिकित्सा शिक्षा विधेयक पारित गर्ने प्रयास भएपछि संसद्मा मंगलबार मुठभेडको अवस्था सिर्जना भएको छ । मंगलबार बसेको प्रतिनिधिसभाको बैठकमा गिरिजाप्रसाद कोइराला र सुशील कोइरालाका नाममा रहेको अस्पताल संघीय सरकारको मातहत राख्ने निर्णय मन्त्रिपरिषदको बैठकबाट नभएसम्म सदन चल्न नदिने भन्दै प्रमुख प्रतिपक्ष दल नेपाली कांग्रेसले वेल घेराउ गरेको थियो ।

वेल घेराउकै बीचमा सभामुख कृष्णबहादु महराले शिक्षा मन्त्री गिरिराजमणि पोखरेललाई ‘शिक्षा तथा स्वास्थ्य समितिको प्रतिवेदनसहितको राष्ट्रिय चिकित्सा शिक्षा विधेयक, २०७५ माथि छलफल गरियोस्’ भनी प्रस्ताव प्रस्तुत गर्न समय दिएका थिए । उक्त विधेयक त्यसलगत्तै पारित गर्ने कार्यसूची प्रतिनिधिसभाको थियो । आफूसँग भएको सहमति पूर्ण कार्यान्वयन गरेर विधेयक सच्याउनुपर्ने डा. गोविन्द केसी १६ औं सत्याग्रहमा छन् । 

सभामुखले मन्त्रीलाई समय दिएलगत्तै कांग्रेस सांसदहरु आक्रोशित भएका थिए ।  कांग्रेस सांसदहरुले मन्त्री पोखरेललाई रोष्ट्रममा जान रोक्ने प्रयास गरेपछि सत्तापक्षका सांसदहरुले मन्त्रीलाई घेरामा राखेर रोष्ट्रमतर्फ लगेका थिए । त्यहिबेला कांग्रेसका सांसदहरुले आफूलाई ‘कुहिनाले हिर्काएको’ मन्त्री पोखरेलले बताए ।

सत्तापक्ष र विपक्ष सांसदबीच वेलमा धकेलाधकेल भएपछि सभामुख महराले बैठक १५ मिनेटका लागि स्थगित गरेका थिए । स्थगित बैठक केहीबेरमा सूचना टाँस गर्दै शुक्रबारसम्मका लागि स्थगित गरिएको थियो । कांग्रेसले सभामुख पार्टीको कार्यकर्ता र सरकारजस्तै बनेको भन्दै आक्रोश व्यक्त गरेको छ ।

“सभामुख कोठामा नबसेर मन्त्रीलाई पहिले नै लगेर रोष्ट्रममा राख्ने ?,” कांग्रेस सांसद गगन थापाले आक्रोश व्यक्त गर्दै भने, “हाम्रो विषय संसदको सभामुखसँग हो । सभामुखले संसद र प्रतिपक्षको मर्यादा राख्नुभएन । प्रतिपक्ष उभिएका बेला र सिंगो सदन उभिएको बेला सदन चल्छ ? सभामुख पार्टीको कार्यकर्ता हो ?”

थापाले सभामुखले यसअघि पनि यस्तै व्यवहार देखाएको आरोप लगाए ।

“यो भन्दा पहिले पनि यस्ता कुरा भएका छन् । आज जुन व्यवहार भएको छ । शक्ति पृथकीकरण भुलेर डरलाग्दो परिदृष्यको घटना भएको छ । ११ गते अघि नै आज भएको घटनाका बारेमा कांग्रेससँग बसेर क्षमायाचना गर्ने र आइन्दा यस्तो काम नगर्ने अवस्था आएन भने हामी सडक र सदनबाटै आन्दोलन गर्छौं,” थापाले भने ।

उनले प्रतिपक्षलाई समाप्त पार्ने प्रयासका रुपमा लिएको बताउँदै सरकारको कुरा पनि सभामुखले जिम्मा लिन खोजेको बताए ।

“जबसम्म नेपाल सरकारले हामीले उठाएका विषय सम्बोधन नगरेसम्म सदन नचलोस् भन्ने हो । सरकारको कुरा सभामुखले जिम्मा लिने हो ?,” थापाको प्रश्न थियो, “हामीलाई वेलसम्म जाने बाटो रोकेर राख्ने ? सरकारको नियत र सदनको नियत एकै हुन्छ ? आजै देखाइदिन्छौं भनेर भन्ने ? अस्पतालको विषय पनि सामान्य विषय होइन । यो नेपाली कांग्रेसको अस्तित्वलाई समाप्त पार्ने प्रयास हो । प्रमुख प्रतिपक्षलाई पनि उभिन पाउँदैन भने देशमा केही उभिने वातावरण छैन भनेर संकेत दिएको हो ।”

उता नेकपाका सांसद खगराज अधिकारीले भने कांग्रेसले आफ्नो मुखुण्डो उघारेको आरोप लगाए ।

“कांग्रेसले मर्यादा मान्दैन भनेर भन्नुपर्यो । कांग्रेसले उठाएको विषय शेरबहादुर देउवा प्रधानमन्त्री हुँदा नै पोखरा विश्वविद्यालयमा नै लैजानुपर्छ भनेर निर्णय गरेको छ। गिरिजाप्रसाद कोइराला अस्पताल जनताले बनाएको अस्पताललाई त्यसबेलाका स्वास्थ्यमन्त्रीले साइनबोर्ड झुन्डाएका मात्रै हुन्,” उनले भने , “कांग्रेस सांसदले हदैसम्मको काम गर्नुभएको छ । उहाँहरुकै अनुरोधमा स्थगित गराइएको हो । कांग्रेसको मुखुन्डो उघारियो । गोविन्द केसी अनशनमा बसालेको प्रमाणित भयो । दुईवटा माग देखाउने मात्रै हो । एजेन्डाविहीन भएपछि यस्तो काम हुँदैछ । यो मात्रै रोक्नुपर्ने प्रक्रिया हुन्छ ? संसदमा गएको कति भयो ? रोक्नैपर्ने कसम खाएको किन ? शान्ति प्रक्रिया पूरा भइसकेका बेला पनि त्यो बेलाका जघन्य अपराधीलाई कारवाही गर्नुपर्छ भनेर संविधानलाई उल्लंघन गर्न खोजेको हो ? कांग्रेस यसैको मसिहा बनेको हो ?”

उनले मन्त्रीमाथि पनि हातपात भएको बताए ।

मन्त्री पोखरेलले पनि आफुलाई कुहिनाले घचेटेको बताए ।

“अनशन चिकित्सा शिक्षासँग मात्रै सम्बन्धित छैन,” उनले भने, “मलाई केही भएको छैन । मन्त्रीको ठाउँबाट जान्छु । प्रतिपक्षका साथीहरुले जे जे गर्नुभयो । कुहिनाले मन्त्रीलाई जान नदिने हो ? मैले पनि विगतमा प्रमुख सचेतक भएर काम गरेको छु । म गइराखेको बेला मलाई कुहिनाले घोँच्न मिल्छ ? यो काम संसदको मर्यादाभित्र पर्छ ? सभामुखलाई आफ्नो च्याम्बरसम्म जान नदिने रवैया कहिँ देख्नुभएको छ ? नेपालको इतिहासमा नभएको काम भएको छ । सभामुखलाई च्याम्बरमा जान नदिन काम प्रतिपक्षले गरेको छ ।”