मस्को । बेलारुसकी मोडल तथा यौन गुरु अनास्तासिया भाशुकेभीच रुसको थुनाबाट मुक्त भएकी छन् । थाइल्याण्डमा यौन प्रशिक्षण दिएको अभियोगमा उनलाई गएको फेब्रुअरी महिनामा त्यहाँ गिरफतार गरी थुनामा राखिएकोमा उनलाई गएको साता थाइल्याण्डले रसियालाई बुझाएको थियो ।

रुसको अदालतमा मंगलबार उनलाई रुसमा यौन धन्दा चलाएको अभियोगमा थुनामा राखेकोमा अदालतले रिहा गरेको हो ।

सन् २०१६ को अमेरिकाको राष्ट्रपतीय निर्वाचनमा रुसी सहयोगको बारेमा रुसका धनाढ्य ओलेग डेरीपास्काले गरेको कुराकानीको रेकर्ड आफूसँग रहेको दाबी गरेकी यी यौन गुरुलाई अदालतले यसबारेमा सोध्दा बताउन अस्वीकार गरेकी थिइन् । 

रुसी धनाढ्यले भने यसअघि नै  त्यो कुरा गलत भएको बताउँदै आएका थिए । उनलाई अदालतले मंगलबार रिहा गरेपनि उनीमाथिको अभियोग भने यथावत रहेको रुसी अधिकारीहरुले बताएका छन् ।