काठमाडौं । मेलम्ची खानेपानी आयोजनामा नयाँ ठेकेदार नियुक्तिका लागि सरकारले ठेक्का प्रक्रिया छोट्याउने तयारी गरेको छ । मेलम्ची विकास समितिले आयोजनाको काममा ढिलाइ नगर्न ठेकेदार नियुक्ति फास्ट ट्रयाकबाट गरिने बताएको छ ।
सार्वजनिक खरिद ऐनअनुसार टेन्डरका लागि सूचना प्रकाशित गरी ४५ दिन र थप १५ गरी २ महिनासम्म ठेकेदार कम्पनी पर्खनुपर्छ ।

“ठेकेदार कम्पनी छनोटको यही प्रक्रिया छोट्याउने तयारी भइरहेको छ,” समितिका प्रवक्ता राजेन्द्र पन्तले भने । मेलम्ची आयोजनाको ठेकेदार छनोट गर्न मन्त्रिपरिषद् बैठकले निर्णय गरे पनि सम्पूर्ण प्रक्रियाअनुसार निर्माण कम्पनी नियुक्त गर्न झण्डै १ वर्ष लाग्ने समिति स्रोत बताउँछ ।

सार्वजनिक खरिद ऐन र मन्त्रिपरिषद् निर्णयअनुसार कम्पनी नियुक्त गर्ने दुवै विकल्पको प्रक्रिया छोट्याउने तयारी भइरहेको छ । मेलम्ची आयोजनामा हालसम्म चीनको सीआसीसी र इटालीको सीएमसी कम्पनीले काम गरेका छन् । जसमा सीआरसीसीले ०५६ सालबाट ०६९ असोजसम्म काम गरेको छ । 

‘सन्तोषजनक प्रगति नदेखिएको’ भन्दै सरकारले आयोजनाबाट सीआरसीसीलाई हटाएको थियो । भूकम्प र नाकाबन्दीपछि सीएमसीले सरकारसँग १ अर्ब ३६ करोड क्षतिपूर्ति मागेकोमा सरकारले ३६ करोड मात्र तिर्ने शर्त तेर्स्याएपछि आयोजना र सीएमसीबीच असारबाट दूरी बढ्दै आएको हो ।

सरकारले क्षतिपूर्ति नतिरेपछि आर्थिक रुपमा टाट पल्टिएको बताउँदै पुस २ गतेबाट सीएमसीले मेलम्चीको काम छोडेको हो । मेलम्चीे आयोजनाको हेडवक्स, सुरुङ र भेन्टिलेसनको बाँकी काम गर्न नेपाली निर्माण कम्पनी नै छनोट गर्ने सरकारको तयारी रहेको समितिका प्रवक्ता पन्तले बताए । 

एसियाली विकास बैंक र मन्त्रालयको छलफलपछि बाँकी कामलाई विभिन्न प्याकेज बनाएर ठेक्का लगाइने छ ।  बाँकी कामलाई कतिवटा प्याकेज बनाएर कतिवटा निर्माण कम्पनीलाई ठेक्का लगाउने भन्नेबारे बुधबार टुङ्गो लाग्ने समिति स्रोतले बाह्रखरीलाई जानकारी दिएको छ ।