एजेन्सी । रासीइ भान डेर डुसेन र एन्डिक फेलुकवायोको अर्धशतकप्रेरित दक्षिण अफ्रिकाले मंगलबार राति पाकिस्तानविरुद्धको दोस्रो एकदिवसीय अन्तर्राष्ट्रिय क्रिकेट ५ विकेटले जितेको छ ।
डुर्बानस्थित किङ्समेड रंगशालामा दक्षिण अफ्रिकाले टस जितेर फिल्डिङ गर्ने निर्णय गरेको थियो । पहिले ब्याटिङका लागि निम्त्याइएको पाकिस्तानले ४५.५ ओभरमा सबै विकेट गुमाएर २ सय ३ रन बनाएको थियो । २०४ रनको लक्ष्य दक्षिण अफ्रिकाले ४२ ओभरमा ५ विकेट गुमाएर पुरा गर्यो ।
जितसँगै दक्षिण अफ्रिकाले पाकिस्तानविरुद्धको पाँच खेलको एकदिवसीय अन्तर्राष्ट्रिय शृङ्खला १-१ को बराबरी गरेको छ । पहिलो खेलमा पाकिस्तान ५ विकेटले विजयी भएको थियो ।
अलराउण्ड प्रदर्शन गरेका दक्षिण अफ्रिकाका फेलुकवायोले ४ विकेट तथा तब्राइज शाम्सिले ३ विकेट लिएपछि पाकिस्तानका कुनै पनि ब्याट्सम्यानले खुलेर खेल्न सकेनन् । हसन अलीले बनाएको ५९ रन नै पाकिस्तानको इनिङमा बनेको सबैभन्दा ठूलो स्कोर हो । अलिबाहेक कप्तान सरफराज अहमेदले ४१ रन जोडे । फकर जमानले २६ र शोएब मलिकले २१ रन जोडे ।
दक्षिण अफ्रिकाका फेलुकवायो र शाम्सीबाहेक कागीसो राबडाले २ विकेट लिए । डुवाने ओलिभरको नाममा १ विकेट रह्यो ।
२ सय ४ रनको लक्ष्य पछ्याएको दक्षिण अफ्रिकाले शुरूमै तीन विकेट गुमाए पनि भान डेर डुसेन र डेबिड मिलरले घरेलु टोलीको इनिङ उकासे । मिलर ३१ रन बनाएर पवेलियन फर्किएपछि भान डेर डुसेन र फेलुकवायोले छैटौँ विकेटका लागि १ सय २४ रनको साझेदारी गर्दै दक्षिण अफ्रिकालाई ५ विकेटको जित दिलाए । भान डेर डुसेनले अविजित ८० रन बनाउदा तथा फेलुकवायोले ६९ रनमा अविजित रहे ।
पाकिस्तानका साहिन साह अफ्रिदीले ३ तथा साडव खानले २ विकेट लिए । दुई टोलीबीचको तेस्रो एकदिवसीय अन्तर्राष्ट्रिय खेल शुक्रबार हुनेछ ।