एजेन्सी । दक्षिण कोरियालाई क्वार्टरफाइनलमा प्रतिद्वन्द्वीका रूपमा पाएको कतारका प्रशिक्षक फेलिक्स सान्चेजले एसियन कपको उपाधि आफुहरूले जित्ने दाबी गरेका छन् । 

सन २०२२ को बिश्वकप आयोजनाको जिम्मेवारी पाएको कतारले मंगलबार इराकमाथि १-० को नतिजा निकाल्दै क्वार्टरफाईनलमा स्थान बनाएको हो । नाहयन रंगशालामा बासम अलि अल   रविले दोस्रो हाफमा फ्री किकबाट गरेको सुन्दर गोलमा कतारले इराकलाई हराउँदै क्वार्टरफाईनलमा स्थान बनाएको थियो । 

एसियन कपमा पहिलो नकआउट खेल जितेको कतारले अब सेमिफाइनलका लागि शुक्रबार दक्षिण कोरियाबिरूद्ध खेल्नेछ । कतारका प्रशिक्षक सान्चेजले एसियन कपमा इतिहास रच्ने बताए ।  "एउटा मौका पायो भने सबै जित्न चाहन्छ ।  त्यसका लागि सक्षम छौं भनेर हाम्रा खेलाडीले प्रमाणित पनि गरेका छन्," कतारका प्रशिक्षक सान्चेजले भने । 

त्यसअघि दक्षिण कोरियाले बहराइनलाई २-१ ले हराउँदै क्वार्टरफाइनलमा स्थान बनाएको थियो । निर्धारित ९० मिनेटको समय १-१ को बराबरीमा सकिएपछि थप गरिएको ३० मिनेटमा जिन-सु किमले गरेको गोलमा दक्षिण कोरियाले अन्तिम आठमा स्थान बनाएको थियो ।
२०१५ मा फाइनल खेलेको दक्षिण कोरियाले आफ्नो स्तर अनुसारको फुटबल खेल्न नसेको भन्दै स्टार खेलाडी  सन-ह्युङ मीन र प्रशिक्षक पाउलो बेन्टोको आलोचना भैरहेको छ । 

एसियन कप क्वार्टरफाइनलका प्रतिस्पर्धी 
दक्षिण कोरियाबिरूद्ध कतार
युनाइटेड अरब इमिरेट्स (युएई)बिरूद्ध अस्ट्रेलिया 
चीनबिरूद्ध इरान
भिएतनामबिरूद्ध जापान