काठमाडौं । प्रमुख प्रतिपक्षी दल नेपाली कांग्रेसभित्र कोइराला परिवार भर्सेस सभापति शेरबहादुर देउवा पक्षबीचमा द्वन्द्व निकै चर्किने संकेत देखिएको छ । नेपाली कांग्रेस पर्साले बुधबार वीरगञ्जमा आयोजना गरेको जिल्लास्तरीय कार्यकर्ता भेलालाई सम्बोधन गर्ने क्रममा सभापति देउवा कोइराला परिवारमाथि आक्रामक रुपमा खनिएका थिए ।
उनले कोइराला थर हुँदैमा पार्टी सभापति बन्न नपाइने बताउँदै कोइराला परिवारलालाई प्रत्यक्ष रूपमै महाधिवेशनबाट सभापति बन्न चुनौती दिएका थिए । यसबारेमा बाह्रखरीसँग बिहीबार बिहान कुराकानी गर्दैै सो पार्टीका नेता डा. शेखर कोइरालाले भने, “म राजनीतिक संस्कारमा विश्वास गर्छु । आदरणीय सभापतिजीले कुन सन्दर्भमा किन त्यसो भन्नु भयो मलाई थाहा छैन । उहाँले नै यसबारेमा जवाफ दिने कुरा हो ।”
कोइरालाले दोहोर्याएर भने, “म राजनीतिक संस्कारमा हुर्केको मान्छे हो । अहिलेलाई यति मात्रै भन्छु ।”
केही दिनअघि कोइराला परिवारका तीनजना नेता महामन्त्री डा. सशांक कोइराला, डा. शेखर कोइराला र सुजाता कोइराला एउटा कार्यक्रममा जाँदा एउटै मालामा बसेर फोटो खिचाएका थिए । त्यसको केही दिनमै सभापति देउवा वीरगञ्जमै गएर कोइराला परिवारको आलोचना गरेका हुन् । सभापति देउवाले पार्टी कसैको बपौती नभएको भन्दै कोइराला थर हुँदैमा सभापति बन्न नपाइने बताएका थिए ।
उनले नेपाली कांग्रेस एउटा प्रजातान्त्रिक पार्टी भएको जनाउँदै नाम र थरकै आधारमा राजनीतिक हैसियत नपाउने बताएका थिए । देउवाले शेखर लगायतका नेताहरुले जे पायो त्यही बोल्दै हिंडेको भन्दै अनुशासनहिन अभिव्यक्ति दिने तथा काम गर्ने नेता र कार्यकर्तालाई तह लगाउने चेतावनी समेत दिएका थिए ।
उनले छिट्टै अनुशासन समिति गठन गरी पार्टीमा अन्तर्घात गर्ने नेता कार्यकर्तालाई कारबाही गर्ने समेत सो अवसरमा बताएका थिए ।