काठमाडौं । चलचित्र ‘जात्रै जात्रा’को बाँकी छायांकन यही साताबाट सुरु हुने भएको छ । छायांकनका लागि लोकेसन हन्ट गर्न निर्माण पक्ष अहिले चितवन पुगेको छ ।
“छायांकनका लागि लोकेशन खोज्न अहिले हामी चितवन आइपुगेका छौं । पर्सी (शनिबार)बाट हामी बाँकी छायांकन गर्दैछौं,” कलाकार तथा निर्माता रविन्द्रसिंह वानियाँले भने ।
‘जात्रै जात्रा’का मुख्य कलाकारमध्येका एक विपिन कार्की मोटरसाइकल दुर्घटनामा परेर घाइते भएपछि चलचित्रको छायांकन स्थगित भएको थियो । चलचित्रमा विपिनसँगै रविन्द्रसिंह वानिया र रविन्द्र झा मुख्य भूमिकामा छन् । वर्षा राउत र दयाहाङ राईको पनि ‘जात्रै जात्रा’मा अभिनय देख्न सकिनेछ । वर्षा ‘जात्रा’मा पनि थिइन् भने दयाहाङ सिक्वेलमा भित्रिएका हुन् । यो चलचित्रलाई प्रदीप भट्टराइले निर्देशन गर्दैछन् । ‘जात्रा’को सफलतापछि त्यसको सिक्वेलका रुपमा यो चलचित्र निर्माण सुरु भएको हो ।