काठमाडौं । नायक राजेश हमालले आफूले गर्दै आएकाभन्दा केही फरक खालको चलचित्रको तयारी गरिरहेको बताएका छन् । पछिल्लो समय आफूले अभिनय गरेको चलचित्र दर्शकले नरुचाएपछि फरक खालको मुभीमा काम गर्ने तयारी गरिरहेको उनले बताएका छन् । 

“पछिल्लो समय मैले अभिनय गरेका वागमती र सकुन्तला दुबै चलचित्र राम्रो भएन,” हमालले एक टेलिभिजन शोमा भने, “त्यसपछि मैले सोचेँ कि अहिले हामी जुन नयाँ तरिका नयाँ टेक्निक भनिरहेका छौं, त्यही ढङ्गबाट जाउँ भन्ने सोचिरहेको छु ।”

अहिले पनि विभिन्न चलचित्रबाट अफरहरु आइरहेको भन्दै उनले अब विषयबस्तु, टिम र रोल राम्रो भएका चलचित्रमा मात्रै काम गर्ने सोचमा रहेको हमालले बताएका छन् । 

चलचित्र ‘सकुन्तला’लाई दिनेश श्रेष्ठले निर्देशन गरेका थिए । जसमा राजेश तेस्रोलिंगी महिलाको भूमिकामा थिए । ‘वागमती’ सन्नी केरेलाले निर्देशन गरेका थिए ।