काठमाडौं । प्रधानमन्त्री केपी शर्मा ओलीले ६८ औँ जन्मोत्सव मनाइरहेका छन् । २००८ फागुन ११ गते इवा–२ तेह्रथुममा जन्मिएका ओली मुलुकको ३८ औँ प्रधानमन्त्रीमा बहाल छन् ।

सत्ता सम्हालेको वर्ष दिन भर्खरै पूरा गरेकाले पनि हुनुपर्छ प्रधानमन्त्री ओलीलाई रचनात्मक र आलोचनात्मक दुवै खाले शुभकामनाको वर्षा नै भएको छ ।

नेकपाका अध्यक्षसमेत रहेका प्रधानमन्त्री ओलीलाई रचनात्मक शुभकामना दिनेमा अगाडि देखिएका छन्– पार्टी स्थायी कमिटी सदस्य योेगेश भट्टराई । 

सत्ता एवम् पार्टी सञ्चालनमा रचनात्मक आलोचक र सिर्जनात्मक समर्थक दुवै भूमिकामा देखिएका भट्टराईले सामाजिक सञ्जालमा लेखेका छन्–

“प्रिय कमरेड जन्मदिनको अनेकअनेक शुभकामना !
अंगालो र छातीमा अझ धेरै समेटियून्,
टाढा–टाढासम्म दृष्टि पुगोस 
नजिककालाई सोधियोस्, टाढाकालाई खोजियोस 
नयाँ पुस्ताले सधैं खोजिरहून्,
आत्मबल र इच्छाशक्तिको प्रशंसा गर्दछु 
थप उदारता र सामूहिकताको अपेक्षा गर्दछु !”

भट्टराइको यो पोष्ट सामाजिक सञ्जालमा लोकप्रिय देखिएको छ । शनिबार बिहान साढे १० बजेसम्म २८ सयले मन पराएका छन् । झन्डै सात सय प्रतिक्रिया र ५५ सेयर भएको छ । 

त्यस्तै प्रधानमन्त्री ओलीलाई क्याबिनेट मन्त्रीहरूले पनि शुभकामना दिएका छन् । सरकारका प्रवक्ता सूचना तथा सञ्चारमन्त्री गोकुल बास्कोटा जसलाई प्रधानमन्त्री ओलीको छायाँछविका रूपमा समेत चित्रण गरिन्छ । उनले पनि माइक्रो ब्लगिङ साइटमा शुभकामना सन्देश व्यक्त गरेका छन् ।संस्कृति पर्यटन तथा नागरिक उड्डयनमन्त्री रवीन्द्र अधिकारी र प्रधानमन्त्रीको मुख्य सल्लाहकार विष्णु रिमाल पनि शुभकामना सन्देश दिन छुटेका छैनन् ।

आलोचना सुन्ने बानी परोस्

सत्ता–समर्थक, प्रतिपक्षलेमात्रै होइन प्रधानमन्त्रीलाई सर्वसाधारणले पनि उत्तिकै शुभकामना दिएका छन् । तर, अधिकांशको शुभकामना एकैनासे छ– प्रधानमन्त्रीमा आलोचना सुन्ने धीरता होस् । आलोचकप्रति असहिष्णु नदेखियून् ।

बाबाजी ह्याण्डलबाट ट्विटर प्रयोगकर्ता लेख्छन्– “जन्मदिनको अनेक–अनेक शुभकामना प्रधानमन्त्रीज्यू ! स्वस्थ रहनूस्, नेपालीलाई सम्मृद्धिका लागि उत्साहित गरिरहनूस् अनि स्वस्थ आलोचना र प्रश्नहरू पचाउन सक्ने क्षमता बढोस् ! जय होस् !”

अर्का ट्विटर प्रयोगकर्ता एकतारे लेख्छन्– “धेर चोथाले हुनुहुन्न । 
राम्रो कामको पनि जस पाइँदैन । हेप्पी बर्थडे !”

मनीष झाको शुभकामना पनि त्यस्तै छ । माइक्रोब्लगिङ साइटमा लेख्छन्– प्रम जन्मदिनको शुभकामना ! राजनीतिक स्थिरता र जनतालाई बेच्नुभएको सपनाकोलागि तपाईंको जीवन आवश्यक छ। म यो देशको नागरिक हुँ र तपाईं प्रम, अरिङ्गालको मात्र हैन । तपाईंको सुबुद्धि, सुस्वास्थ्य र सत्कर्मको प्राथना गर्छु किनकि तपाईको हरेक दैनिकीको मेरो हरेक दिनसँग सम्बन्ध छ ।”