काठमाडौं । लिलितपुरको भैंसेपाटीमा शुक्रबार साँझ भएको बम विष्फोटका घाइतेलाई पूर्वप्रधानमन्त्री पुष्पकमल दाहाल प्रचण्ड, गृहमन्त्री रामबहादुर थापा र प्रहरी प्रमुख सर्वेन्द्र खनालले भेटेका छन् । घाइते प्रतिक्षा खड्का र उषा मानन्धरलाई मेडिसिटी अस्पताल पुगेर पूर्वप्रधानमन्त्री प्रचण्ड, गृहमन्त्री थापा र प्रहरी प्रमुख खनालले शनिबार भेटेका हुन् ।
गृहमन्त्री थापाले घाइतेको उपचारमा लाग्ने सम्पूर्ण खर्च सरकारले बेहोर्ने बताएका छन् । विष्फोटमा भैंसेपाटी बस्दै आएका सिंहबहादुर गुरुङको मृत्यु भएको छ ।
यसैबीच घटनाको अनुसन्धानका क्रममा प्रहरीले एक जना पक्राउ गरेको छ । पक्राउ पर्नेमा बम विष्फोट भएको एनसेलको कार्यालयका सुरक्षा गार्ड छन् ।
“सीसीटीभी फुटेजमा एक व्यक्तिले पोको बोकेर आएको र उक्त पोको त्यहीँ छोडेर हिँडेको देखिएको छ,” प्रहरी प्रवक्ता एसएसपी उत्तम सुवेदीले भने, “सेक्युरिटी गार्डले उक्त पोको उठाएर बाहिर निकालेको देखिएको छ । तर उसले प्रहरीलाई खबर गरेको छैन । किन प्रहरीलाई खबर गरेन भन्ने विषयमा उसलाई पक्राउ गरेर अनुसन्धान थालेका छौं ।”
सुवेदीका अनुसार टाइम बम विष्फोट भएको थियो । शुक्रबार साँझ ८ बजे भैंसेपाटीस्थित एनसेलको कार्यालयमा विष्फोट भएको थियो ।
प्रहरीले भूमिगत विप्लव समूहतर्फ अनुसन्धान सुरु गरिएको जनाएको छ ।