एजेन्सी । अष्ट्रेलियाका पूर्वकप्तान स्टिभ स्मिथ र उपकप्तान डेविड वार्नरमाथिको एक वर्षे प्रतिबन्ध आजबाट सकिएको छ । बल टेम्परिङ गरेको पुष्टि भएपछि स्मिथ र डेबिडलाई एकवर्षको प्रतिबन्ध लागेको थियो । क्यामरन ब्यान्क्रफ्ट भने ९ महिनाको प्रतिबन्धमा परेका थिए ।

दक्षिण अफ्रिकाको घरेल मैदान केपटाउनमा तेस्रो टेस्टमा बल टेम्परिङ गरेको आरोप लागेको थियो । आरोप पुष्टि भएपछि अष्टेलिया क्रिकेटले तीन खेलाडीमाथि प्रतिबन्ध लगाएको थियो । प्रतिबन्ध फुकुवा भएसँगै स्मिथ र वार्नर अब अष्ट्रेलियाको राष्ट्रिय टोलीमा फर्किने छन् । इंग्ल्यान्ड र वेल्समा संयुक्त रुपमा आयोजना हुने एकदिवसीय विश्वकपमा दुबै खेलाडी टोलीमा फर्किने बताइएको छ । एकचोटि अनुभवी खेलाडी प्रतिबन्धमा परेपछि अष्टेलिया केही धरासायी भएको थियो । 

अहिले दुबै खेलाडी इण्डियन प्रिमिएर लिग क्रिकेट खेलिरहेका छन् । प्रतिबन्ध सकिएकै दिन दुई खेलाडी आज एकअर्काको सामना गर्दैछन् । स्मिथ राजस्थान रोयल्स तथा वार्नर सनराइजर हैदरावादबाट खेल्दैछन् ।