काठमाडौैं । बारा र पर्सा जिल्लामा आइतबार साँझ आएको विनाशकारी हावाहुरीका कारण कम्तिमा पनि २७ जनाको मृत्यु भएको छ । सयौं घाइते छन् । घाइतेको वीरगन्ज र बारा जिल्ला अस्पताललगायत विभिन्न स्थानमा उपचार भइरहेको छ ।

हावाहुरीका कारण बाराका मात्रै २६ जना र पर्साका एक जनाको मृत्यु भएको हो । अधिकांश मृतकको पहिचान हुन सकेको छैन । हावाहुरीपछि उद्धार कार्य कसरी  गरियो ? अहिलेको अवस्था र चुनौती के हुन् ? बाह्रखरीले बाराका एसपी सानुराम भट्टराईसँग सोधेको थियो ।
एसपी भट्टराईले बाह्रखरीसँग गरेको कुराकानीको अंश–

दिनभर अवस्था सामान्य थियो । तर साँझ एकाएक निकै डरलाग्दो हावाहुरी र असिना पर्न थाल्यो । एकैछिनपछि विभिन्न स्थानबाट हावाहुरीले ठूलो क्षति गरेको खबर आइपुग्यो । खबर पाउनासाथ म, सीडीओसा’बलगायत सबै निस्कियौं । नेपाली सेना, सशस्त्र प्रहरी लगायतलाई खबर गरियो । बाहिर निकै भयानक दृश्यहरु देखिएका थिए । नेपालमा पनि यस्तो हावाहुरी आउँछ र ? भन्ने प्रश्न आम मानिसले गरिरहेका थिए । रातको समय भएकाले हामीलाई विभिन्न चुनौती पनि थिए । ठाउँ–ठाउँमा बिजुलीका पोलहरु ढलेका, गाडीहरु पल्टिएका, बस्तीहरु अँध्यारा, जताजतै हुरीको त्रास र आतंक ।

मानिसहरुमा हताहती देखिन्थ्यो । उद्धार गर्न गएका सवारी, एम्बुलेन्स बाटोबाटै फर्किएका थिए । जान सक्ने अवस्थै थिएन । किनकि तारहरु सडकमा असरल्ल थिए । त्यो दृश्य शब्दमा वर्णन गर्न निकै कठिन छ । सयौंको संख्यामा घाइते थिए । मैले सरकारीलगायत सबै अस्पतालका चिकित्सकहरुलाई तयारी अवस्थामा रहन खबर गरेँ । हामी सबै स्थानमा गाडीमा जान सम्भव थिएन । पैदल रुपमा हिँड्न थाल्यौं । रातभरी नेपाल प्रहरीलगायत सुरक्षाकर्मीको टोली खटियो । मृतक र घाइतेको उद्धारपछि हाम्रो अर्को प्राथमिकता धनसम्पत्तिको सुरक्षा गर्नु थियो । 

कयौं घरहरु पूर्णरुपमा ध्वस्त थिए । पक्की घरहरु पनि ढलेका, कैयौं घरका छाना उडेका, रुखहरु ढलेका, भागाभाग थियो । यस्तोमा घरहरुमा चोरी, लुटपाट हुने सम्भावनातर्फ पनि हामी सचेत थियौं । रातभर हामी सबै फिल्डमै खटियौं । घाइतेको सबै विवरण आइसकेको छैन । क्षतिको विवरण पनि संकलन गरिरहेका छौं । उपचार भइरहेका अस्पतालमा घाइतेहरुको अवस्थाको बारेमा जानकारी लिइरहेका छौं । चिकित्सकहरुका अनुसार काठमाडौं लैजानुपर्ने घाइतेहरु प्रायः छैनन् । सबैको उपचार जारी छ । प्रारम्भिक जानकारीअनुसार कुनै टोलहरु पुरै ध्वस्त भएका छन् । ५०–५० घरहरु पूर्णरुपमा ढलेको जानकारी प्रारम्भिक रुपमा पाएका छौं भने सयौं घरमा आंशिक क्षति भएको छ । 

अबको चुनौती भनेको कयौं बेघरबार भएका छन् । उनीहरुलाई राहत र पुनस्र्थापना गर्नु हो । यसको प्रक्रिया पनि सुरु भइसकेको छ । रेडक्रस लगायतका गैरसरकारी संघ संस्था पनि जुटेका छन् । स्थानीय युवा लगायत सबैको सहयोग छ । तर कतिपय सामाजिक सञ्जाल प्रयोगकर्ता, सञ्चारमाध्यमले मृतकको संख्या बढाएर लेखिरहेका छन् । मान्छेको मृत्युजस्तो कुरामा संवेदनशील हुनुपर्छ जस्तो लाग्छ । अहिलेसम्म २७ जनाको मात्रै ज्यान गएको छ ।