अनेकौं राष्ट्रिय कीर्तिमान कायम भएका छन् आठौं राष्ट्रिय खेलकुदमा । प्रदेश नम्बर ५ को नेपालगन्जमा बैशाख ५ गते राष्ट्रपति विद्यादेवी भण्डारीले उद्घाटन गरेकी आठौं राष्ट्रिय खेलकुदका प्रतियोगिताहरू चैत २७ देखि नै सुरु भएका थिए । खेलकुद प्रतियोगिताहरू नेपालगन्जबाहेक दाङ, कपिलवस्तुका साथै ललितपुरमा पनि भइरहेका छन् । आठौं राष्ट्रिय खेलकुदको समापन बैशाख ११ गते हुने कार्यक्रम रहेको छ । राष्ट्रिय खुलकुद आयोजना गर्नु चानेचुने काम होइन । तर, यसपटक पनि अन्तिम अवस्थामा तयारी गर्ने र पदाधिकारीको सुविधाका लागि खेलाडीलाई सास्ती कटाउने प्रवृत्तिमा भने सुधार भएको देखिएन । खेलाडीलाई खाना र खाजाको समेत राम्रो प्रबन्ध नसकेको समाचार आइरहेका छन् । यो पक्कै पनि उत्साह, हर्ष र गर्वको विषय हैन ।

दाङमा खेलाडीहरूले भोकाएका बेलामा खाजासमेत खान नपाएको समाचार आएको छ । नेपालगन्जको रंगशालामा कतिपय काम उद्घाटन हुनेबेलासम्म पनि सकिएको थिएन । कामको गुणस्तर कमजोर भएको गुनासो त नेपालका लागि सार्वजनिक निर्मााण्को स्थायी प्रवृत्ति हो । सरकारी अधिकारीहरूलाई निर्माण कार्यको गुणस्तर कायम गर्न केले रोक्ने हो कुन्नि? सबैलाई भ्रष्टाचारले नै कक्रक्क पारेको त पक्कै हैन होला ! यस्तै जति नै ठूलो सार्वजनिक अनुष्ठान भए पनि व्यक्ति सबैभन्दा महत्त्वपूर्ण हुन् भन्ने स्वीकार गर्न पनि शासक र प्रशासक दुवैलाई कठिन हुने कारण पनि बुझ्न सकिँदैन । खेलकुद प्रतियोगितामा सबैभन्दा बढी महत्त्व त खेलाडीकै सुविधालाई दिइनुपर्ने हो । तर, दाङमा खेलाडीहरू फुको चाउचाउ र खुसार्नी खाइरहेको तस्बिर सार्वजनिक भएको छ ।  

खेलाडीहरूले असुविधा र कठिनाइ सहेर पनि सकेसम्म राम्रो खेल्ने प्रयास गरिरहेको समाचारले भने सबै नेपालीलाई हर्षित र गौरवान्वित बनाइएको छ । प्रत्येका प्रतियोगितामा कम्तीमा नयाँ राष्ट्रिय कीर्तिमान कायम गर्न सके नेपालीले अन्तर्राष्ट्रिय समुदायमा शिर ठाडो पार्ने एउटा माध्यम खेलकुद पनि हुनसक्ने देखिन्छ । तर, यसका लागि शासकहरूमा इमानदारी र खेलाडीलाई देखाउने हैन यथार्थमै सम्मान गर्ने मानसिकता हुनु आवश्यक हुन्छ । खेलकुद प्रतियोगिता होस् वा अरू कुनै सार्वजनिक काम त्यसबाट हातलाग्ने कमिसनका आधारमा मात्रै हेरिने भएपछि शासकहरू इमानदार हुनसक्ने प्रश्नै भएन । खेलाडीलाई उचित खाजाको समेत व्यवस्था नगरिनुको कारण हेलचेक्य्राइँ र बदमासी दुवै हुनुपर्छ । उद्घाटन र पदाधिकारीका नाममा हुने फजुलखर्चमा मात्रै कटौती गरिएको भए पनि खेलाडीको पेट काट्नुपर्ने पक्कै थिएन । राष्ट्रिय खेलकुद प्रतियोगिताजस्तो महत्त्वपूर्ण अनुष्ठानका आयोजकहरूसँग आग्रह छ – खेलाडीहरू हर्षित, गौरवान्वित र उत्साहित भएर फर्कने वातावरण बनाऊ ! प्रतियोगिता सकिएका छैनन् । त्यसका लागि छ त केही दिन बाँकी ।