काठमाडौं । प्रधानमन्त्री तथा नेपाल कम्युनिष्ट पार्टी (नेकपा) का अध्यक्ष केपी शर्मा ओलीले केही साथीहरु राजतन्त्र व्यूँताउने सपना देखेर हिँडेको देख्दा अचम्म लागेको टिप्पणी गरेका छन् ।
नेपाल कम्युनिष्ट पार्टीको ७० औं बार्षिकोत्सव समारोह सम्बोधनका क्रममा प्रधानमन्त्री ओलीले मुलुक ७० वर्षको संघर्षपछि मात्र लोकतन्त्र प्राप्त भएको भन्दै राजतन्त्र व्यूँताउने सपना सपनामात्रै रहने बताए । उनले भने, " कोही पनि जन्मिदै ठूलो र राजा नभइ हाल्ने भएकोले अब यो मुलुकमा राजतन्त्र व्यूँताउने सपना नदेख्न म साथीहरुलाई आग्रह गर्दछु । हामीले राणाविरुद्ध, राजाकाविरुद्ध, पञ्चायतका विरुद्ध लड्यौं, असमानताविरुद्ध, थिचोमिचो र शोषणकाविरुद्ध लडेर आज सही ठाउँमा आएका छौं ।"
उनले आजको दिन सिंगो मुलुकका लागि नै खुशीको क्षण भएको बताएका छन् । प्रधनमन्त्री ओलीले तत्कालीन नेकपा र तत्कालीन माओवादी पार्टीबीचको एकीककरण टुंगिएको प्रसंगमा यस्तो बताएका हुन् ।
‘‘वामपन्थीका लागि मात्रै नभएर सिंगो देशका लागि आजको दिन खुशीको क्षण हो,’’ उनले भने । प्रधानमन्त्री ओलीले दुई पार्टीबीचको एकीकरण पछि बनेको संसदको ठूलो दल नेकपाले राष्ट्रियतको रक्षा गर्दै राष्ट्रियताको आन्दोलनलाई उचाइमा पुर्याएको दाबीसमेत गरे ।
‘‘यो पार्टीले राष्ट्रियताको रक्षा, राष्ट्रियताको आन्दोलनलाई ठिक उचाईमा पुर्याएको छ । यसैले लोकतन्त्रका निम्ति संघर्षपूर्ण बलिदानी गरेको छ । मुलुकबाट निरंकुशतन्त्र, सामन्तीतन्तलाई फालेर लोकतनत्रमा पुर्याएको छ,’’ प्रधानमन्त्री ओलीले भने ।
प्रधानमन्त्री ओलीले देशको सार्वभौमसत्ता, भौगोलिक अखण्डता, राष्ट्रिय स्वाधिनताका पक्षमा आफ्नो पार्टी भएको बताउँदै अब जग थप मजबुत भएको दाबीसमेत गरे ।