काठमाडौं । कृषि मन्त्रालयले अन्तर्राष्ट्रिय प्रांगारिक विज्ञ सम्मेलन गर्ने भएको छ । रसायानिक मल र विषादी निरुत्साहित गरि प्रांगारिक खेतीलाइ प्रोत्साहन गर्न मन्त्रालयले सम्मेलन आयोजना गर्न लागेको हो ।

प्रांगारिक कृषि प्रबर्द्धन उच्चस्तरीय कार्यदलको सोमबार मन्त्रालयमा बसेको तेस्रो पूर्ण बैठकले यस्तो निर्णय गरेको हो । सम्मेलन आगामी वैशाख ३१ र जेठ १ गते काठमाडौंमा हुन लागेको कार्यदलका सदस्य सचीव डा. गंगा आचार्यले जानकारी दिए ।

आचार्यका अनुसार सम्मेलनको लागि भारत, भुटान, क्युबा र स्पेनका प्रांगारिक विज्ञ आउने भएका छन् । सम्मेलनमा १ सय ५० जना विज्ञको सहभागिता हुने कार्यदलले जनाएको छ ।

सम्मेलन व्यवस्थापनका लागि कृषि तथा पशुपन्छी विकास राज्यमन्त्री रामकुमारी चौधरीको संयोजकत्वमा ७ सदस्यीय समिती गठन गरिएको छ । कार्यक्रमको उद्घाटन प्रधानमन्त्री केपी शर्मा ओली र समापन नेकपा अध्यक्ष पुष्पकमल दाहाल प्रचण्डले गर्ने बताइएको छ । 

सम्मेलनबाट आएका सुझावलाई समेटेर कार्यदलले प्रतिवेदन तयार गरी जेठको पहिलो हप्तासम्म प्रधानमन्त्रीलाई बुझाउने तयारी रहेको बताइएको छ । प्रांगारिक खेतिलाइ प्रबर्द्धन गर्न गत पुस २९ गते कृषि तथा पशुपन्छी विकास मन्त्री चक्रपाणी खनालको संयोजक्तवमा १५ सदस्यीय कार्यदल गठन भएको थियो । 

कार्यदलले अहिलेसम्म सातै प्रदेश र उपत्यकामा गरी १० वटा अर्न्तक्रिया गरेर सुझाव संकलन गरेको कार्यदलका सदस्य कृष्णप्रसाद पौडेलले जानकारी दिए ।