नेपालगन्ज । आठौं राष्ट्रिय खेलकुद अन्तर्गत राष्ट्रिय पौडीमा गौरिका सिंहले दुई स्वर्ण जित्न सफल भएकी छन् । त्यस्तै त्रिभुवन आर्मी क्लबका एलेक्स शाह र पुलिसका शयद हम्जा शाहले राष्ट्रिय कीर्तिमान कायम गरेका छन् । 

सोमबार नेपालगञ्जको सिग्नेट होटको स्वीमिङ पुलमा भएको खेलामा आर्मीका एलेक्सले १०० मिटर फ्रिस्टाइलमा कीर्तिमान बनाउन सफल भएका हुन् । एलेक्सले निर्धारित दुरी ५५ दशमलब ३८ सेकेण्डमा पुरा गर्दै कीर्तिमान कायम गारेका हुन । स्वर्ण जितेका उनले शिरिष गुरुङको नाममा रहेको ५७ दशमलब ०३ सेकेण्डको कीर्तिमान भङ गर्दै नयाँ कीर्तिमान बनाएका हुन् । 

सोमबार भएको स्पर्धामा पुलिसका शयद हम्जाले ५७ दशमलब १० सेकेण्डसहित रजत र आर्मीका अनुभव सुब्बाले ५७ दशमलब ९७ सेकेण्डको समयसहित कास्य जिते ।

यस्तै पुलिसका शयदले पुरुष ५० मिटर बटरफ्लाईमा राष्ट्रिय कीर्तिमान बनाउन सफल भएका छन् । सायद हम्जाले २७ दशमलब १० सेकेण्डको समय दुरी पार गरे । स्वर्ण जितेका उनले आर्मीका अनुभव सुब्बाको नाममा रहेको २७ दशमलब ७१ सेकेण्डको राष्ट्रिय कीर्तिमानलाई भंग गरेका हुन् । 

यस स्पर्धामा अनुभवले रजत जिते । तेन्जिङ गुरुङले कास्य जिते । त्यस्तै ४ सय मिटर फ्रिस्टाइलमा एनआरएनएका नाथन दोर्जे शेर्पाले स्वर्ण जित्न सफल भए । उनले ४ मिनेट ३३ दशमलब ०९ सेकेण्डको समय निकाले  । ४ मिनेट ३९ दशमलब ४७ सेकेण्डसहित एपीएफका नासिर हुसेनले रजत जित्दा ५ मिनेट ०१ दशमलब ५० सेकेण्डसहित एपीएफकै उर्गेन महर्जनले कास्य जिते । 

महिलातर्फ आर्मीकी गौरिकाले दुई स्वर्ण जितिन् । गौरिकाको यो सहित ४ स्वर्ण भएका छन् । महिला १०० मिटर फ्रिस्टाइलमा गौरिकाले १ मिनेट ६२ सेकेण्डको समय निकाल्दै स्वर्ण जितिन् । आर्मीकै सोफिया शाहले रजत र एपीएफकी टीसा शाक्यले कास्य जितिन्  ।

महिला ५० मिटर बटरफ्लाईमा पनि गौरिकाले स्वर्ण हात पारिन । उनले ३३ दशमलब ०६ सेकेण्डको समय निकालिन । यस स्पर्धामा पुलिसकी अनुसिया तण्डुकारले ३४ दशमलब ६२ सेकेण्डसहित रजत र सृबी महर्जनले ३७ दशमलब ३० सेकेण्डको समय निकाल्दै कास्य जितिन ।

पुरुष २०० सय मिटर ब्रेस्टस्ट्रोकमा एपीएफका सुभम श्रेष्ठले स्वर्ण जित्दा पुलिसका दीपानकर अवालेले रजत र प्रदेश १ का विकास कुमालले कास्य जिते । महिला  २०० सय मिटर ब्रेस्टस्ट्रोकमा आर्मीकी डुवाना लामाले स्वर्ण जितिन् ।  आर्मीकै उपास्ती महर्जनले रजत र पुलिसका अदिप्सा बैद्यले कास्य जितिन् ।