काठमाडौं । नेपाल स्रष्टा समाजले २०७६ सालको दमन्ता खनाल स्मृति नारीस्रष्टा सम्मान लोक गायिका डीक्रा बादीलाई प्रदान गरेको छ ।
देउडा गायन तथा ठाडी भाकाका माध्यमबाट लोक गायन तथा सांस्कृतिक उत्थानमा विशेष योगदान पुर्याए वापत सो सम्मान प्रदान गरेको हो । कञ्चनपुरमा बसोबास गर्दै आएकी डीक्रा बादीले नेपालका बादी समूदायलाई सामाजिक रुपान्तरणका लागि अभियन्ताको कार्य गर्दैआएकी छन् ।
सोमबार काठमाडौंमा आयोजित एक कार्यक्रममा लोकगायिका डीक्रा बादीलाई वरिष्ठ साहित्यकार तथा चलचित्रकर्मी यादव खरेलले सम्मान पत्र प्रदान गरे । सम्मानित व्यक्तित्वलाई नगद राशी ११ हजार १ सय ११ रुपैयाँ पनि प्रदान गरियो ।
कार्यक्रमका प्रमुख अतिथि स्रष्टा यादव खरेलले लोकगायिका डीक्रा बादीलाई सम्मान गर्न पाउँदा खुशी लागेको बताए । सम्मानका लागि स्रष्टा चयन सिफारिस समितिका संयोजक अधिकारवादी दुर्गा घिमिरेले डीक्रा बादीलाई सम्मानका लागि चयन गर्न पाउँदा आफैलाई प्रेरणा मिलेको बताइन् ।
सो सम्मान पुष्पा खनालले आफ्नी आमाको स्मृतिमा स्थापना गरेकी हुन् । सोही अवसरमा पुष्पा खनालको गीत संग्रह ‘गह पोखिएर’को विमोचन गरियो । गीतको पुस्तक विमोचनका साथै पुष्पाद्वारा रचित एउटा गीतको म्युजिक भिडियो पनि सार्वजनिक गरियो ।
स्रष्टा समाजका अध्यक्ष कवि विधान आचार्यको सभापतित्वमा सम्पन्न कार्यक्रममा प्राडा गोविन्दमान सिंह कार्की, डीक्रा बादी, नवराज तिमिल्सिना, पुष्पा खनाल, लेखजंग खत्री, जानु धितालले बोलेका थिए ।