काठमाडौं । सोमबार तामझामसहित सत्तारूढ नेपाल कम्युनिस्ट पार्टी (नेकपा)ले ७० औँ पार्टी स्थापना दिवस मनाइरहेको थियो । हलभित्र नअटेर प्रज्ञा प्रतिष्ठानको चौरमा पनि नेता–कार्यकर्ता छरिएका थिए । उनीहरूलाई बाहिरै डिजिटल पर्दामार्फत् भाषण सुन्ने बन्दोवस्त मिलाइएको थियो ।
११ महिनापछि पार्टी एकताले गति लिन लागेकामा नेता–कार्यकर्तामा अलग्गै उत्साह सञ्चार भएको थियो । टाढा–टाढाबाट एकता–विस्तारको साक्षी बस्न नेता–कार्यकर्ता कमलादी ओइरिएका थिए ।
पार्टी एकताको उल्लासपूर्ण क्षणमा वरिष्ठ नेता माधवकुमार नेपाल भने असन्तुष्ट बन्न पुगे । र, कार्यक्रम चलिरहँदा बीचमै उठेर हिँडे ।
कार्यक्रम चल्दाचल्दै उठेर हिँडेका नेता नेपाल कार्यक्रम सकिँदा पनि मञ्चमा देखा परेनन् । र, उनले कार्यक्रम बहिष्कार गरेको हल्ला चल्यो ।
किन ?
बाह्रखरीलाई प्राप्त जानकारी अनुसार एकता विस्तार प्रक्रियामा नेता नेपालको कुनै असन्तुष्टि थिएन । न, पार्टी अध्यक्ष पुष्पकमल दाहाल र महासचिव विष्णु पौडेलको मध्यमार्गी भूमिका र त्यसआधारमै तय भएको नयाँ मापदण्ड, विधि प्रक्रिया र नवघोषित जिल्ला नेतृत्वप्रति नै नेपाल असहमत थिए ।
नेपाल निकट स्रोतले बाह्रखरीलाई बताएअनुसार नेता नेपालको असन्तुष्टि अर्का वरिष्ठ नेता झलनाथ खनालप्रति थियो । आफूलाई तय गरिएको सिटमा नेता खनाल गएर बसिदिएपछि असन्तुष्टि स्वरूप नेता नेपालले कार्यक्रमको बीचमै उठेर हिँडे । पछि फर्किएनन् ।
मञ्चमा सचिवालयका नेतालाई मात्र पुग्नेगरी ९ वटा कुर्सी राखिएको थियो । दुईजना अध्यक्षलाई सोफा र बाँकी ७ जना नेतालाई फलामको कुर्सीको प्रबन्ध मिलाइएको थियो ।
कार्यक्रमको शुरू नहुँदै पुगेका नेता खनालले पहिलो वरीयताको कुर्सी ओगटिदिए । प्रधानमन्त्री, पार्टी अध्यक्षद्वयसँगै मञ्चमा पुगेका नेता नेपाल खनाल पछिको दोस्रो सिटमा परे । त्यसैको असन्तुष्टि स्वरूप नेपाल ‘मैले अन्तै समय दिएको छु’ भन्दै उठेर हिँडेको नेकपाका नेता बताउँछन् ।
यद्यपि उद्घोषकको भूमिका निर्वाह गरेको महासचिव विष्णु पौडेलले खनाललाई नेपालपछि नै आसन ग्रहण गराएका थिए ।
खनाल शुरूदेखि नै आफ्नो वरीयता सच्याउन पार्टीभित्र आन्दोलित छन् । सचिवालयको बैठकमै वरीयता मिचिएको गुनासो गरेको भए पनि सुनुवाइ भएको छैन । साविक एमालेको विधान (९ औँ महाधिवेशनबाट पारित) अनुसार खनालमात्रै वरिष्ठ नेता थिए । पार्टी एकताका बेला खनाल चीनमा थिए । वरीयताक्रममा नेपालभन्दा पछि परे ।
यो पनि पढ्नूहोस् -
नेकपा एकताः व्यक्ति प्रचारको भद्दा नमुना
मञ्चको दायाँबायाँ अध्यक्षद्वयको फोटो राखेका पनि आपत्ती
नेकपामा पछिल्लो समय फोटो संस्कृति हुर्किएको छ । बिमिस्टेक सम्मेलन, लगानी सम्मेलन, योगदानमा आधारित सामाजिक सुरक्षा कोषको कार्यक्रम सबैमा प्रधानमन्त्रीका फोटो अंकित ठुल्ठूला होडिङबोर्डको अनुहार सहरले देखेकै हो ।
सोमबारको कार्यक्रममा पनि मञ्चको दायाँतर्फ पुष्पकमल दाहाल ‘प्रचण्ड’ र बायाँ तर्फ केपी शर्मा ओलीको तस्बिर राखिएको थियो ।
पार्टीको एकता विस्तारको घोषणामा अध्यक्षद्वयको फोटो राखिएकाप्रति नेपाल असन्तुष्ट थिए । पार्टी एकतामा सबैको भूमिका भएको तर अध्यक्षद्वयलाईमात्रै एकताको नायक चित्रित गर्न खोजिएको भन्दै असन्तुष्टि स्वरूप उठेर हिँडेको नेकपाका नेता बताउँछन् ।
