काठमाडौं । राष्ट्रपति विद्यादेवी भण्डारील चीनले प्रस्ताव गरेको बेल्ट एण्ड रोड इनिसिएटिभ (बीआरआई) सकारात्मक भएको बताएकी छन् ।
हालै चिनियाँ रिपोर्टरहरुको टोलीलाई भेट दिएकी राष्ट्रपति भण्डारीको सो भनाइ चीनको सरकारी मुखपत्र सीजीटिएनले सार्वजनिक गरेको हो । सीजीटीएनलाई सीसीटिभी—९का रुपमा समेत चिनिन्छ जुन चीनको राज्य नियन्त्रित अंग्रेजी भाषाको सरकारी समाचार च्यानल हो ।
बीआरआईमार्फत आउने चुनौती सामना गर्नका लागि संयुक्त रुपमा पहल गरेर त्यसको सम्बोधन गर्नुपर्ने समेत राष्ट्रपतिले बताएकी छन् । बीआरआई सम्बन्धी सम्मेलनमा भाग लिन भोलि बुधबार राष्ट्रपति भण्डारी बेइजिङ जानु अघि चिनियाँ सञ्चार माध्यममा उनको भनाइ आएको हो ।
कतिपयले बीआरआइलाई डेब्ट ट्रयाप (ऋणको पासो) भन्ने आरोप लगाएको सन्दर्भमा बोल्दै उनले अनुदान र ऋण देशको आवश्यकता अनुसार हुने बताएकी छन् । उनले यो देशको विकासको लागि सहयोगी हुने समेत बताएकी छन् ।
‘‘त्यसलाई (अनुदान र ऋण) लाई सकारात्मक रुपमा लिनुपर्छ,” राष्ट्रपतिले ऋणले रकमको प्रवाह (क्यास फ्लो) र मुलुकमा वित्त अवस्थामा सुविधा पुग्ने बताएकी छन् । ‘‘त्यसैले हामी उनीहरुप्रति नकारात्मक हुनुहुँदैन,” राष्ट्रपतिले भनेकी छन् ।
‘‘विश्वकै अतिकम विकसित मुलुक भएको नाताले नेपाल आफैंलाई विकासका लागि आर्थिक र प्राविधिक सहयोग चाहिएको छ,” राष्ट्रपति भण्डारीले भनेकी छन् ।
नेपालले अहिले बीआरआईको एक भागको रुपमा ‘ट्रान्स हिमालयन मल्टी डाइमेन्सनल कनेक्टिभिटी नेटवर्क’ का लागि चीनसँग काम गरिरहेको जनाउँदै नेपालको उज्ज्वल भविश्य चीनको उज्ववल भविश्य र नेपालप्रतिको उसको हार्दिकतामा निर्भर हुने जनाएकी छन् ।
राष्ट्रपतिले छिमेकी भएको नाताले दुवै देशको भाग्य एक अर्कामा अन्तरसम्बन्धित रहेको आफूले महसुस गरेको समेत जनाएकी छन् ।
