राष्ट्रपति विद्यादेवी भण्डारीले सरकारको नीति तथा कार्यक्रम संसद्मा वाचन गर्दा प्रयोग भएका शब्दले साताको अन्तिम दिनमा तरंगै उत्पन्न भयो ।
आर्थिक वर्ष २०७६/७७ को सरकारको वार्षिक नीति तथा कार्यक्रम संसद्मा प्रस्तुत गर्ने क्रममा उनले ‘मेरो सरकार’ शब्द प्रयोग गरेपछि तरंग उत्पन्न भएको हो । उनले नीति तथा कार्यक्रम प्रस्तुत गरेर नसक्तै सामाजिक सञ्जालमा यसबारेमा व्यापक बहस र आलोचना सुरु भएको थियो ।
नीति तथा कार्यक्रम सुनेर बसेका कतिपय सांसदले सामाजिक सञ्जालमा तत्कालै विरोध जनाएका थिए । त्यसमध्ये एक थिए नेपाली कांग्रेसका सांसद गगन थापा ––“म त नेपाल सरकारको (जनताको सरकार) नीति तथा कार्यक्रम सुन्न संसद्मा उपस्थित भएको, यहाँ त राष्ट्रपतिज्यूबाट महामहिमज्यूको निजी सरकारको कार्यक्रमको पो घोषणा भैरहेको छ ।@PM_Nepal ज्यू, नेपाल सरकारको नीति तथा कार्यक्रम सुन्न कहाँ, कहिले आउँ होला ?,” उनले ुसामाजिक सञ्जाल ट्विटरमा भने ।
सरकार समर्थक केही सामाजिक सञ्जाल प्रयोगकर्ताले अन्य देशको प्रचलन भन्दै बचाउ गर्न खोजे पनि राजतन्त्रको झल्को भन्दै राष्ट्रपति र र सरकारको आलोचना गर्ने क्रम भने व्यापक भयो । शनिवार प्रकाशित केही पत्रपत्रिकाले समेत यस विषयलाई समेटेका छन् ।
नयाँ पत्रिका दैनिकले पहिलो पृष्ठमा ‘राष्ट्रपतिको सम्बोधनमा राजतन्त्रको झल्को’ शीर्षकमा समाचार प्रकाशित गरेको छ ।
नयाँ पत्रिका दैनिकले उपशीर्षकमा उल्लेख गरेको छ – संसद्मा नीति तथा कार्यक्रम प्रस्तुत गर्दा राष्ट्रपति भण्डारीले पञ्चायतकालीन शैलीमै २१ पटक ‘मेरो सरकार’ भनिन् ।’ तत्कालीन राजाहरुले राष्ट्रिय पञ्चायत वा संसद्लाई सम्बोधन गर्दा ‘मेरो सरकार’ भन्थे । संविधानमै पनि त्यसबेला ‘श्री ५ को सरकार’ उल्लेख थियो ।
पछिल्ला राजा ज्ञानेन्द्र शाहले पनि सो शब्द प्रयोग गरे भने २०६२–६३ को जनआन्दोलनपछि गिरिजाप्रसाद कोइरालाले प्रस्तुत गरेको नीति तथा कार्यक्रममा ‘नेपाल सरकार’ र ‘हामी’ शब्द प्रयोग गरे । त्यसपछि त्यसैको निरन्तरता भएको भए पनि राष्ट्रपति भण्डारीले प्रयोग गरेका यी शब्दपछि गणतन्त्र थप जोखिममा परेको त होइन ? भन्ने अड्कलबाजीहरु पनि भएका छन् ।
कान्तिपुर दैनिकले पनि राष्ट्रपतिले भनिन् –मेरो सरकार । शीर्षकमा समाचार प्रकाशित गरेको छ । नागरिक दैनिकमा ‘मेरो सरकार’ मा राजतन्त्रको झल्को शीर्षकमा समाचार प्रकाशित भएको छ । दुई सय १८ बुँदे सरकारको नीति तथा कार्यक्रम प्रस्तुत गर्दा राष्ट्रपतिले विगतमा राजाले जस्तै पटकपटक मेरो सरकार पदावली प्रयोग गरेको समाचारमा उल्लेख छ ।
अन्नपूर्ण पोस्टले भने यस विषयलाई त्यति महत्व दिएको पाइएन ।
शीर्ष नेताको निवास नै कार्यालय
शनिबारको अन्नपूर्ण पोस्टमा ‘शीर्ष नेताका निवास नै कार्यालय’ शीर्षकमा समाचार प्रकाशित भएको छ । पुष्पकमल दाहाल, केपी शर्मा ओलीदेखि शेरबहादुर देउवाले निवास नै कार्यालयको रुपमा प्रयोग गरेको विषयलाई उठाइएको छ ।
त्यसमा नेपाल कम्युनिस्ट पार्टीका नेता घनश्याम भुसालले भनेका छन्–राजाजस्ता हाम्रा नेता । उनले भनेका छन्– हिजो राजासँग प्रजातन्त्र माग्ने एउटा चलन थियो । अनि राजाले प्रजातन्त्र दिन्थे । अहिले राजाको त्यो ठाउँमा हाम्रा नेता पुगेका छन् ।’
अन्य समाचार
बितेको साता राष्ट्रपति भण्डारीको चीन भ्रमणसम्बन्धी समाचारले छापा माध्यममा राम्रै चर्चा पायो । चीनसँग पारवहन प्रोटोकलमा हस्ताक्षर भएपछि नेपालले चीनका समुद्री बन्दरगाह प्रयोग गर्न पाउने विषयको बढी चर्चा भयो । तर, कतिपय समाचारमा भारतसँगको परनिर्भताको अन्त्य भएको उल्लेख भए पनि नेपाली व्यवसायीलाई भारत वा चीनको कुन बन्दरगाह प्रयोग गर्दा फाइदा हुन्छ भन्ने विषयमा भने समाचार प्रकाशित भएको पाइएन ।
जग्गा विवाद कायमै
बालुवाटारमा ललिता निवासले चर्चेको जग्गाको विषय बितेको साता पनि सेलाएन । प्रधानमन्त्री केपी शर्मा ओलीले सरकारी जग्गा हिनामिना गर्ने जो कोहीलाई पनि कारबाही गर्ने बताएका छन् भने बालुवाटारबाहेक अन्य स्थानमा पनि सरकारी जग्गा व्यक्तिका नाममा बनाइएको भन्दै लगातार समाचार प्रकाशित भएको छ । सिंहदरबारकै जग्गा पनि अतिक्रमणमा परेको भन्दै नयाँ पत्रिका दैनिकले समाचार प्रकाशित गर्यो । नागरिक दैनिकले धोबीखोलको जग्गा पनि व्यक्तिमा नाममा दर्ता भएको पाइएको समाचार प्रकाशित गर्यो ।
बालुवाटार प्रकरणमा भने बितेको साता सुवर्ण शमशेरका सन्तानले मुख खोलेका छन् । तर, यस विषयलाई छापा माध्यमले खासै प्राथमिकता दिएको पाइएन । उनका सन्तानले आफूहरुको सम्पत्ति तत्कालीन पञ्चायती सरकारले जबर्जस्ती लिएको र आफूहरुले त्यसको क्षतिपूर्ति कहिले पनि नलिएको दाबी विज्ञप्तिमार्फत् गरेका छन् ।
प्रजातन्त्र ल्याउनका लागि भएको आन्दोलनमा सहयोग गरेकै कारण तत्कालीन पञ्चायती सरकारले आफूहरुको जग्गा हडपेको उनीहरुको दाबी छ ।
उता प्रधानमन्त्री ओलीले पनि नेकपा (नेकपा)का महासचिव विष्णु पौडेलले ललिता निवासमाको ८ आना जग्गा नहडपेको बताएका छन् । उनले बालुवाटारको जग्गालाई लिएर नेकपा र सरकारविरुद्ध भ्रम फैलाउन खोजिएको भन्दै महासचिव पौडेलको बचाउ गरेका छन् ।
बालुवाटारको सो जग्गा धितोमा राखेर बैंकबाट ऋण लिएको, जग्गा प्रकरणका सूत्रधार विदेश फरार भएको लगायतका विषयमा पनि यो बितेको साता समाचार प्रकाशित भए ।
अन्नपूर्ण पोस्ट १८ वर्षमा
अन्नपूर्ण पोस्ट दैनिकले १७ वर्ष पूरा गरी यो साता १८ वर्षमा प्रवेश गरेको छ ।
लोकतन्त्र, राष्ट्रियता, सुशासन र स्वतन्त्रतासहितको समुन्नत नेपाल निर्माणको महान् उद्देश्यका निम्ति नै समर्पित रहेको भन्दै पोस्टका अध्यक्ष क्याप्टेन रामेश्वर थापाका तर्फबाट प्रकाशकीय प्रकाशित भएको छ । अन्नपूर्ण पोस्टलाई बाह्रखरी परिवारका तर्फबाट शुभकामना !