काठमाडौं । राष्ट्रिय जनता पार्टी (राजपा) नेपालका नेता सरदसिंह भण्डारीले राष्ट्रपतिद्वारा संघीय संसदमा प्रयोग गरिएको वाक्यांश ‘मेरो सरकार’ का बारेमा प्रष्ट्याउनु सरकारको पहिलो दायित्व भएको बताएका छन् । आइतबार सरकारको नीति तथा कार्यक्रममाथि संसद्को छलफलमा भाग लिँदै नेता भण्डारीले ‘मेरो सरकार’ वाक्यांशका बारेमा जनतालाई प्रष्ट पार्नु सरकारको पहिलो दायित्व भएको बताएका हुन् ।
‘‘यो संयोगवश आएको हो वा नियतवश आएको हो ?,’’ उनले प्रश्न गर्दै भने, ‘‘सरकारको पहिलो दायित्व छ, यसलाई प्रष्ट पार्नु पर्छ । के हो यो ? यसका पछाडि के छ ?’’ नेता भण्डारीले मुलुकमा राजतन्त्रका बेला राजाले प्रयोग गर्ने वाक्यांश राष्ट्रपति विद्यादेवी भण्डारीद्वारा संसदमा प्रयोग भएको सुन्दा आफू झल्याँस्स भएको बताए ।
राष्ट्रपतिबाट प्रयोग भएको वाक्यांशले आफूलाई दसैंको टीकालगायतका घटनाहरु सोच्न बाध्य बनाएको भन्दै उनले त्यसबाट आफ्नो मनमा चिसो पसेको बताए । ‘‘राजाका पालामा सुन्थे, मेरो सरकारले यस्तो गर्यो, उस्तो गर्यो । अहिले यो शब्द सुन्दा म झल्यास्स भएँ,’’ भण्डारीले भने, ‘‘त्यसपछि विभिन्न घटनाहरु मेरो दिमागमा घुम्न थाले । दसैंको घटना, टीकाको कुरा । यसले मेरो मनमा चिसो पस्यो ।’’