काठमाडौं । प्रधानमन्त्री केपी शर्मा ओलीले राष्ट्रपति विद्यादेवी भण्डारीले संघीय संसदमा प्रयोग गरेको ‘मेरो सरकार’ वाक्यांशको फेरि बचाउ गरेका छन् । उनले नेपालमा धेरै अभ्यासहरु मिल्न बाँकी रहेको बताउँदै नमिलेका कुराहरु मिलाउँदै जानुपर्ने बताए । “हाम्रा अभ्यासहरु मिलेका छैनन् । मिलाएर लैजानुपर्छ । यस पटक यो मिल्यो, बाँकी मिलाउँदै जानुपर्छ,’’ उनले मिल्न बाँकी कुराहरुमध्ये यसक पटक ‘मेरो सरकार’ मिलेको दाबी गर्दै भने ।
उनले सरकारको नीति तथा कार्यक्रममा ‘मेरो सरकार’ वाक्यांश भूलवश नआएको स्पष्ट पारे । “भूलचूकले आएको पो हो कि भन्ने कुरा आएको छ । यो भूलचूक होइन, जानीजानी राखिएको सुविचारित शब्द हो,” ओलीले भने ।
उनले प्रमुख प्रतिपक्षी दलका सभापति शेरबहादर देउवाले राष्ट्रपति भण्डारीको सम्बोधनलाई बेलायती महारानीको शैली भनेकोप्रति आपत्ति जनाए । प्रधानमन्त्री ओलीले देउवालाई बेलायती महारानीसँग तुलना गर्दा कूटनीतिक मर्यादा भुल्न नहुने सुझावसमेत दिए । “राष्ट्रपतिज्यूको सम्बोधन बेलायती महारानीको जस्तो भन्नु उपयुक्त भएन । किनकी बेलायत हाम्रो मित्रराष्ट्र हो । बेलायतकी महारानीको सम्बोधनलाई नेगेटिभ टिप्पणी गर्नु वान्छनिय हुँदैन,’’ उनले भने, “उहाँहरुको आफ्नै परम्परा, आफ्नै तरिका छ । बेलायती महारानीको सम्बोधन नराम्रो हुन्छ र त्यस्तै शैलीको नेपालमा भयो भन्ने कुरा कूटनीतिक हुँदैन जस्तो लाग्छ ।’’
प्रधानमन्त्री ओलीले प्रमुख प्रतिपक्षी दल नेपाली कांग्रेसलाई पनि अहिलेको सरकारलाई मेरो सरकार भन्न सुझाव दिए । प्रधानमन्त्री ओली संसद् बैठकमा सरकारको वार्षिक नीति तथा कार्यक्रममाथि सांसदहरुले उठाएका प्रश्नको जवाफ दिँदै थिए ।