बीबीसी । स्वीडेन अभियोजकहरुले विकिलिक्सका सहसंस्थापक जुलियन असान्जविरुद्धको बलात्कारको अभियोगको फाइल खोलेका छन् । पीडित महिलाका वकिलको आग्रहमा उक्त फाइल खोलेर अनुसन्धान थालिएको बीबीसीले जनाएको छ । 

असान्जले भने सो अभियोग अस्वीकार गर्दै आएका छन् । उनलाई सन् २०१२ मा लण्डनको इक्वेडोरको दूतावासमा शरण दिइएको थियो र त्यतिबेला स्वीडेनलाई सुपुर्दगी गरिएको थिएन । 

स्वीडिस अभियोजकहरुले दुई वर्ष अघि नै यस मुद्दाको अनुसन्धान थाल्‍ने सोच बनाएका थिए । तर, असान्ज त्यो समयमा इक्वेडरको दूतावासको शरणमा भएका कारण उक्क अनुसन्धान अघि बढाउन नसकिएको स्वीडिस अभियोजकहरुले बताएका छन् । स्वीडेनका प्रहरी सहायक निर्देशक इभा मारी पीर्सनका भने, "मैले उक्त मुद्दाको फाइल आजै खोल्ने निर्णय गरेको हो । असान्जले नै बलात्कार गरेको हुनसक्ने आशंका गरिएको छ । हामी अनुसन्धान गर्छौं ।"

४७ वर्षीय असान्जलाई धरौटीको विषयलाई लिएर अहिले ५० हप्ताका लागि बेलायतको जेलमा राखिएको छ । अमेरिकाले असान्जको सुपुर्दगी चाहेको छ । उनले सन् २०१० मा अमेरिकाका कुटनीतिक र सैनिक सूचना सार्वजनिक गरेका थिए । 

उनको रिहाइ र बलात्कारको मुद्दाको फाइल खोल्ने विषयले सुपर्दगी मागिरहेको स्वीडेन र अमेरिकाको विषयलाई लिएर बेलायतलाई अप्ठेरो पर्न सक्ने जनाइएको छ ।