विपक्षीलाई खतरा हुन सक्छन् स्मिथ र वार्नर, विश्वकपमा चल्नसक्छ ब्याटिङको जादू

विपक्षीलाई खतरा हुन सक्छन् स्मिथ र वार्नर, विश्वकपमा चल्नसक्छ ब्याटिङको जादू

एजेन्सी । एकदिवसीय विश्वकप क्रिकेटका लागि आरोन फिन्चको कप्तानीमा रहेको अष्ट्रेलियाको टोली अभ्यासमा व्यस्त छ । विश्व क्रिकेटको वादशाह अष्ट्रेलियाका लागि यो विश्वकप अझ विशेष हुनेछ । अष्ट्रेलियाका लागि अवसर र चुनौती दुवै छ । सन् २०१९ विश्वकप उपाधि हात पार्न सके लगातार दोस्रो पटक र समग्रमा छैटौं पटक उपाधि जित्न सफल हुनेछ । अष्टे«लियाका लागि सुखद् तर विपक्षी टिमका लागि खतरा सावित हुनसक्ने दुई खेलाडी हुन्, पूर्वकप्तान स्टेभन स्मिथ र डेभिड वार्नर । वल टेम्परिङमा एक वर्षे प्रतिबन्धपछि दुवैको राष्ट्रिय टोलीमा पुनरागमन हुँदैछ, त्यो पनि सोझै विश्वकपमा ।

विश्व क्रिकेटका दुई स्टारको टिम फिर्तीले अष्ट्रेलिया बलियो बनेको मात्रै छैन, उपाधिका लागि बलियो दाबेदारी राख्ने सन्तुलित टिमसमेत बनेको छ । एक वर्षको प्रतिबन्धपछि फर्किएका स्मिथ र वार्नरलाई अष्ट्रेलियालाई सफल बनाउन उत्तिकै चुनौती छ । तर अष्ट्रेलियाका पूर्वप्रशिक्षक डरिन लेहमनले दुई खेलाडीले विश्वकपमा ठूलो भूमिका खेल्ने दाबी गरेका छन् । 

गत मार्चमा प्रतिबन्ध फुकुवा भएपछि उनीहरुले हालै विश्वचर्चित क्रिकेट लिग इन्डियन प्रिमिएर लिग क्रिकेटमा खेलेका थिए । वार्नर सर्वाधिक रनकर्ता बन्दा स्मिथले पनि अन्तिम खेलहरुमा उत्कृष्ट लय समातेका थिए । विश्वकप खेल्ने विभिन्न टोलीको चर्चापछि आज हामीले अस्ट्रेलियाका स्मिथ र वार्नरबारे चर्चा गरेका छौं । 

स्टेभन स्मिथ 

विश्व क्रिकेटमा उत्कृष्ट ब्याट्सम्यानको पहिचान बनाएका स्टेभन स्मिथ अष्टेलियाली क्रिकेट टोलीका महत्वपूर्ण सदस्य हुन् । २९ वर्षिय स्मिथ भरपर्दा क्षेत्ररक्षक पनि हुन् । १ सय ८ एकदिवसीय अन्तरराष्ट्रिय क्रिकेटको अनुभव बटुलेका स्मिथले ३४ सय ३१ रन बनाएका छन् । १ सय ६४ उच्च रन बनाएका स्मिथले ८ शतक र १९ अर्धशतक बनाएका छन् ।

१२ नम्बरको जर्सि लगाउने स्मिथले बलिङतर्फ २७ विकेट लिएका छन् । २०१० मा वेष्ट इन्डिजविरुद्ध खेल्दै एकदिवसीय क्रिकेट सुरु गरेका स्मिथले २०१८ को जनवरीमा इङल्याण्डविरुद्ध एकदिवसीय सिरिज खेलेका थिए । लेगस्पिनर समेत रहेका स्मिथ २०१८ मा मार्चमा दक्षिण अफ्रिकाका टेष्टसिरिजमा बल टेम्परिङको आरोप लागेपछि प्रतिबन्धमा परेका हुन् । प्रतिबन्धका समय विभिन्न लिगमा आफूलाई अभ्यस्त बनाएका स्मिथले हालै इन्डियन प्रिमिएर लिग खेले । 

राजस्थान रोयल्सबाट खेलेका स्मिथले अन्तिम तीन खेलमा कप्तानी समेत गरेका थिए । राजस्थानबाट ७ खेल्दा स्थिमले २  खेलमा अर्धशतक बनाएका थिए । यस्तै न्युजिल्याण्डविरुद्धको सिरिजमा उनले ८९ र ९१ रन बनाएका छन् । 

डेभिड वार्नर 
अन्तरराष्ट्रिय क्रिकेटमा शानदार डेब्यु गरेका अष्टेलियाका पूर्वउपकप्तान डेभिन वार्नर विश्वक्रिकेटमा एक चर्चित खेलाडी हुन् । ३२ वर्षिय वार्नरले १ सय ६ एकदिवसीय क्रिकेटमा शानदार प्रदर्शन गर्दै ४ हजार ३ सय ४३ रन बनाएका छन् । क्रिजमा निर्धक्क ब्याटिङ गर्ने वार्नरको अहिलेसम्मको उच्च रन १ सय ७९ रन हो । 

१४ शतक र १७ अर्धशतक बनाएका वार्नरले ४ सय ५४ चौका र ७० छक्का प्रहार गरेका छन् । उमेर समूह हुँदै अष्टेलियाली क्रिकेटमा उदाएका वार्नर ओपनिङ ब्याट्सम्यान हुन् । २००९ मा दक्षिण अफ्रिकाविरुद्ध खेल्दै एकदिवसीय क्रिकेट करिअर सुरु गरेका वार्नरले अन्तिम पटक २०१८ जनवरीमा इङल्याण्डविरुद्ध सिरिज खेलेका थिए । त्यसपछि उनी मार्चमा प्रतिबन्धमा परेका थिए । 

प्रतिबन्धकाबीच विभिन्न लिग खेलेका उनले हालै आइपीएल खेले । १ वर्षपछि ठूलो लिग खेलेका वार्नर सर्वाधिक रनकर्ता बने । सनराइजर्स हैदरावादका लागि ७ खेल खेलेका वार्नर ६ सय ९२ रनसहित शिर्षस्थानमा रहे । आइपीएल अन्तर्गत लिगको पहिलो खेलमा किङ्स–११ पन्जाबविरुद्ध ८१ रन बनाएका उनले त्यसपछि ५ खेलमा अर्धशतक बनाएका थिए । 

प्रतिकृया दिनुहोस
ad