काठमाडौं । धादिङको आदामघाट बन्छेटारबाट त्रिशूली नदीमा बस खस्दा ज्यान गुमाउनेको संख्या ७ पुगेको छ । काँकडभिट्टाबाट काठमाडौंका लागि छुटेको ना ७ ख ४३ ८७ नम्बरको बस गजुरी गाउँपालिकाको बन्छेटारमा घुम्तीबाट त्रिशूली नदीमा खसेको हो ।
दुर्घटनामा ज्यान गुमाउनेमा काठमाडौं थानकोटका ५१ वर्षका राजकुमार सुवेदी, कन्याम इलामका विशाल गिरी र धादिङका राजन आचार्यको सनाखत भएको छ । अन्यको नाम खुल्न नसकेको प्रहरीले जनाएको छ ।
घाइते मध्ये १७ जनाको काठमाडौंको ट्रमा सेन्टर तथा अन्यको धादिङको गजुरी र जिल्ला अस्पतालमा उपचार भैरहेको प्रहरीले जनाएको छ । ट्राफिक निर्देशनालयका डिआइजी पूर्णचन्द्र जोशीका अनुसार बसमा चालक दलका ३ जनासहित ३४ जना सवार रहेको प्रारम्भिक विवरण प्राप्त भएको छ ।