काठमाडौं । नेपाल भलिबल संघका अध्यक्ष मनोरञ्जन रमण शर्माले सासंदहरुलाई नै राष्ट्रिय खेल कुन हो भन्नेबारे जानकारी नरहेको गुनासो गरेका छन् । आइतबार चन्द्रागिरी मेयर कपबारे जानकारी दिन आयोजित पत्रकार सम्मेलनमा संघका अध्यक्ष शर्माले सांसदहरु नै राष्ट्रिय खेलबारे अनभित्र रहेको आरोप लगाएका हुन् । 

केही दिनअघि राज्यव्यवस्था समितिको बैठकमा गएका अध्यक्ष शर्माले राष्ट्रिय खेल कुन हो भनेर सोध्दा उपस्थित सांसद चुपचाप रहेको बताए । उनले सुनाए, “राष्ट्रिय खेल के हो भनेर सोध्दा देशको भूगोलका बारेमा जानकारी राख्ने सांसद सबै मुखामुख गर्न थाले । कतिपयले डन्डीबियो भने । कसरी भलिबलको विकासका लागि उनीहरुले बजेट छुट्याउन सहयोग गर्छन् । राष्ट्रिय खेलबारे सांसदलाई नै जानकारी छैन भने सर्वसाधारणलाई कसरी थाहा हुन्छ होला ? लाजमर्दो अवस्था छ ।”

सरकारले भलिबललाई राष्ट्रिय खेल घोषणा गरेको दुई वर्ष बित्न लाग्दा पनि एक रुपैयाँ सहयोग नगरेको अध्यक्ष शर्माले गुनासो गरे । “सरकारले आजसम्म एक रुपैयाँ दिएको छैन । हामीले यताउति रकम जुटाएर कार्यक्रम गरिराखेका छौं,” अध्यक्ष शर्माले भने ।

प्रस्तावित खेलकुद ऐनमा समेत राष्ट्रिय खेल भलिबलबारे केही नलेखिएको उनले बताए । संघले अहिले खेलकुदसँग सम्बन्धित निकायको खेलकुद ऐनमा राष्ट्रिय खेल उल्लेख गर्न ध्यानाकर्षण गराउँदै आएको छ । पुष्ककमल दाहाल प्रधानमन्त्री तथा दलजित श्रीपाइली खेलकुदमन्त्री हुँदा २०७४ जेठ ८ गते बसेको मन्त्रीपरिषद् बैठकले भलिबललाई राष्ट्रिय खेल घोषणा गरेको थियो ।