एजेन्सी । विश्व फुटबलका लिगहरु गोधुली अर्थात अन्तिम चरणमा पुगेका छन् । चर्चित केही ठूला लिगहरुको समापन भइसकेकाले सिजन २०१८–२०१९ अन्तिम अवस्थामा छ ।
यद्यपी च्याम्पियन्स लिगको फाइनल, कोपा डेल रे र डिएफबी पोकल फाइनल अझै खेल्न बाँकी छ । सकर्थकले यो सिजनमा निकै कडा प्रतिस्पर्धा हेर्न पाए । इङलीस प्रिमिएर लिग अन्तिम चरणसम्म पनि रोमान्चक रह्यो ।
एकअर्काको घरेलु मैदानमा जितका लागि खेलाडीको रोचक प्रतिस्पर्धा पनि हेर्न लायक रह्यो । केही टोलीका सपना पूरा भए केही टोलीले कठोर वास्तविकताको सामना गर्नुपर्यो । म्यानचेस्टर सिटी, बार्सिलोना पेरिस सेन्ट जर्मन ‘पीएसजी’ र बार्यन म्युनिख सबै आफ्नो लिगमा शीर्ष स्थानमा रहे । पहिलो पटक शीर्ष पाँच यूरोपियन लिग च्याम्पियनले सफलतापूर्वक घरेलु मैदानमा उपाधि कब्जा गरे ।
टोलीको प्रदर्शन आफनो ठाउँमा छ । तर त्यही टोलीलाई उचाइमा पुर्याउन कोही न कोही खेलाडीले निर्माताको भूमिका निर्वाह गरेका हुन्छन् । आज हामीले यो सिजनमा उत्कृष्ट प्रदर्शन गरेका पाँच खेलाडीको चर्चा गरेका छौँ ।
५. रहिम स्ट्रलिङ
सिटीलाई उपाधि जिताउन रहिम स्ट्रलिङले महत्वपूर्ण भूमिका निर्वाह गरे । २४ वर्षीय इङ्ल्याण्डका युवा स्टार रहिमलाई प्रशिक्षक पेप ग्वार्डिओलाले एक नयाँ जिवन खोजेको बताएका छन् ।
उनी उदयमान र यूरोपकै उत्कृष्ट विङ्स भएको प्रशिक्षक ग्वार्डिओलाको भनाई छ । जमैकामा जन्मेका स्ट्रलिङले आक्रमक खेलाडी स्ट्रलिङले सम्पूर्ण प्रतिस्पर्धामा २५ गोल गरेका छन् भने १२ गोलका लागि पास उपलब्ध गराएका छन् ।
लिभरपुलका पूर्व विङ्गर रहिम विश्वकै उत्कृष्ट हुने क्षमतावान खेलाडी हुन् । एफए कपको फाइनलमा वार्टफोर्डविरुद्ध उनी म्यान अफ दी म्याचसमेत भएका थिए । उनलाई फुटबल पण्डितहरुले यो सिजनले उनको करिअर बनेको र क्षमता देखिएको बताएका छन् ।
४. साडियो माने
लिभरपुलका साडियो मानेका लागि यो सिजन विशेष रह्यो । सेनेगलका अन्तर्राष्ट्रिय खेलाडी मानेले उत्कृष्ट प्रदर्शनसहित संयुक्त रुपमा गोल्डेन बुट जित्ने खेलाडीमा आफनो नाम पनि लेखाए ।
टिम मेट मोहमद सलाह र आर्सनलका पिरे इमरीकसँगै मानेले गोल्डेन बुट जिते । तिनै खेलाडीले २२ गोल गरेका थिए । साउथ ह्याम्पटनका पूर्व खेलाडी मानेले हरेक खेलमा सोचपूर्वक खेल्दै यो सिजनका विभिन्न प्रतिस्पर्धामा २६ गोल गरे । २७ वर्षीय स्टार माने २०१६ देखि लिभरपुलमा छन् । उत्कृष्ट प्रदर्शनका बाबजुद पनि लिभरपुल प्रिमियर लिगमा दोस्रो स्थानमा रह्यो ।
३. केलियन एमबाप्पे
प्रकृतिले नै उपहार दिएका फ्रान्सका युवा स्टार केलियन एमबाप्पेका लागि यो सिजन निकै उत्कृष्ट रह्यो । फ्रान्सलाई विश्वकपको उपाधि जिताउन नायक बनेका एमबाप्पे यो सिजनमा निरन्तर चम्कीरहे ।
पेरिस सेन्ट जर्मन पिएसजीका एमबाप्पेले बाज्रिलका स्टार नेयमारको अनुपस्थितमा आफूलाई सुम्पिएको जिम्मेवारी ध्यानपूर्वक निर्वाह गरे । पहिलो पटक यूरोपियन गोल्डेन बुट जितेका उनले लिग वानमा २८ खेलमा ३२ गोल गरे ।
उनी यो सिजनमा दोस्रो स्थानमा रहे । ला लिगामा मेस्सीले ३६ गोल गोल गर्दा लिग वानमा एमबाप्पेले ३२ गोल गरे । उनले विश्व फुटबलका लागि ठूलो विश्वास छोडेका छन् । ताकि उनी स्टार क्रिष्टयानो रोनाल्डो र लियोनल मेस्सी जस्तै सफल हुनेछन् ।
२. भर्जिल भान डिजिक
लिभरपुलका एकमात्र डिफेन्डर भर्जिल भान डिजिकले यो सिजनको उत्कृष्टमा आफनो नाम लेखाउन सफल भए । उनले लिभरपुलका लागि यो सिजन उत्कृष्ट प्रदर्शन गरे । सेन्टर ब्याक डिजिकले यो सिजन अधिकांस समय लिभरपुलको रक्षापंक्ति सम्हाले ।
उत्कृष्ट डिफेन्डरमा आफनो नाम दर्ता गराएका उनले च्याम्पियन्स लिगमा बार्सिलोनाविरुद्ध उत्कृष्ट पुनरागमन गर्न महत्वपूर्ण भूमिका निर्वाह गरेका थिए । साउथह्याम्पटका पूर्वखेलाडी डिजिकले एभरेजमा प्रत्येक खेलाडीमा पाँच क्लियर गरेका छन् ।
लिभरपुलले जुन १ मा च्याम्पियन्स लिगको उपाधि लागि प्रतिस्पर्धा गर्दा उनको प्रदर्शनबारे समर्थकमा चासो छ । २७ वर्षीय नेदरल्याण्डका खेलाडी डिजिकले चार गोल पनि गरेका छन् ।
१. लियोनल मेस्सी
यो सिजनको उत्कृष्ट खेलाडीमा बार्सिलोनाका स्टार लियोनल मेस्सी पर्न सफल भएका छन् । बार्सिलोनालाई ला लिगाको उपाधि जिताउन नायक बनेका मेस्सीका लागि यो सिजन निकै उत्कृष्ट रह्यो ।
पाँच पटकको बालोन डी ओर अर्वाड विजेता मेस्सीका लागि व्यक्तिगत रुपमा निकै सफल रहेको फुटबल पण्डितहरुले विश्लेषण गरेका छन् । अर्जेन्टिनाका कप्तान मेस्सीले बार्सिलोनालाई पछिल्ला ११ वर्षमा आठ पटक उपाधि जिताउन सफल भएका हुन् । उनले यो सिजन ३६ गोल गरे ।
विभिन्न खाले प्रतिस्पर्धामा उनको गोलसंख्या ५० रह्यो । चार पटकको च्याम्पियन्स लिग विजेता खेलाडी मेस्सीले युरोपतर्फ १२ गोल आफनो नाममा लेखाए । यद्यपि बार्सिलोना च्याम्पियन्स लिगको सेमिफाइनलको दोस्रो लेगमा अप्रत्यासित रुपमा लिभरपुलसँग पराजित भयो । समग्रमा मेस्सीका लागि यो सिजन निकै उत्कृष्ट रह्यो ।
