काठमाडौं । खानेपानी मन्त्री बिना मगर र वन तथा वातावरण मन्त्री शक्ति बस्नेतबीच शुक्लाफाँटा आरक्ष पीडितहरुको व्यवस्थापन गर्नेबारे छलफल भएको छ । 
कञ्चनपुरस्थित शुक्लाफाँटा वन्यजन्तु आरक्ष (राष्ट्रिय निकुञ्ज) का कारण घरबारविहीन भएका बेलडाँडी गाउँपालिका र बेलौरी नगरपालिकाका करिब १५ सय घरपरिवार पीडितलाई जग्गासहित आवास व्यवस्थाका लागि खानेपानी मन्त्रीसहितको टोलीले वन तथा वातारण मन्त्री बस्नेतसँग छलफल गर्दै यस विषयमा ध्यानाकर्षण गराएको हो ।
निकुञ्जले ०५८ सालमा साविकको रौतेली बिचवा गाउँका बासिन्दाहरुलाई साविकको बेलडाँडी गाविस वडा नं. ९ मा ल्याई बसोबास गराएपछि बेलडाँडीका बासिन्दाहरु घरबारविहीन हुन पुगेका हुन् ।
बेलडाँडी र बेलौरीका स्थानीय बासीहरु घरबारविहीन भएपछि बिचल्लीमा परेका छन् । तत्कालीन समयको समस्या अहिले पनि उस्तै रहेको बेलडाँडी गाउँपालिकाका अध्यक्ष धनबहादुर थापाले बताए ।
अध्यक्ष थापाले समस्या समाधानका लागि भनेर धेरै आयोग बनाइए पनि घरबारविहीन जनताको समस्या अझै समाधान हुन नसकेको स्पष्ट पारे । खानेपानी मन्त्री बिना मगरसहितको प्रतिनिधिमण्डलले वन तथा वातावरण मन्त्री बस्नेतसँग भेट गरी घरबारविहीन भएका नागरिकलाई उचित व्यवस्थापन गर्नुपर्ने माग राखी ध्यानाकर्षण गराइएको हो ।
भेटमा खानेपानी मन्त्री मगर सहितबेलौरी नगरपालिकाका मेयर पोतिलाल चौधरी र बेलडाँडी गाउँपालिकाका अध्यक्ष धनबहादुर थापा लगायतको सहभागिता थियो ।
वन मन्त्री बस्नेतले घरबारविहीन भएका उक्त क्षेत्रका जनतालाई जग्गासहित आवासको व्यवस्थापन चाँडो भन्दा चाँडो गरिने प्रतिवद्धता व्यक्त गरे । आरक्षपीडित जनताको समस्या समाधान गर्न सरकार गम्भीर रहेको मन्त्री बस्नेतको भनाइ छ ।
यस्तै वन मन्त्रीसँगको भेटमा शुक्लाफाँटा राष्ट्रिय निकुञ्ज प्रवेशका लागि पर्यटकलाई सहजता प्रदान गर्न नयाँ प्रवेशद्वार खुल्ने भएको छ । कञ्चनपुरको बेलडाँडीदेखि पर्यटक प्रवेशको लागि नयाँ प्रवेशद्वार खुल्न लागेको हो ।
उक्त प्रवेशद्वारको उद्घाटन वन तथा वातावरण मन्त्री बस्नेत र खानेपानी मन्त्री बिना मगरबाट गराउने तयारी त्यहाँका स्थानीय तहले गरेका छन् । नयाँ खुल्ने प्रवेशद्वारसँगै पर्यटकहरुलाई जङ्गल सफारी गराउनका लागि सहज हुने बेलौरी नगरपालिकाका अध्यक्ष थापाले बताए ।