कोलम्बो । श्रीलंकामा मुसलमान भनेपछि अर्को पक्षले आक्रमणको निसाना बनाउन थालेपछि हालै मुश्लिम समुदायका मानिसहरुले नै मश्जिद भत्काएका छन् । आफूहरु अरुको आक्रमणको निसानामा नपरियोस् भनेर उनीहरुले त्यसो गरेको बीबीसीले जनाएको छ ।
‘‘इस्टर सन्डेको आक्रमणको दिनपछि श्रीलंकामा मुसलमानलाई आतंकवादीको हिसाबले हेर्न थालिएको छ,’’ एमएचएम अकबरले भने ।
गएको अप्रिल महिनामा भएको सो हमलामा २५० जना मानिसको मृत्यु भएको थियो । यसको जिम्बेवार एक कट्टरपन्थी मुश्लिम समूहलाई मानिएको छ । विश्वभरीका मुसलमान रमजानको महिनामा उपवास राख्छन् र प्रार्थना गर्छन् । तर, श्रीलंकामा मसुलमानको एउटा सानो समूहले आफूलाई हिंस्रक समूहबाट अलग गर्नका लागि एउटा मश्जिद भत्काएको हो । सो मश्जिदका मुख्य ट्रस्टी अकबर खान मदतुंग हुन् ।उनले बीबीसीलाई बताए अनुसार अल्लाहमा विश्वास राख्ने मान्छेले नै यस्तो कदम उठाए । अकबर भन्छन्,‘‘गएको अप्रिल महिनाको आक्रमणपछि प्रहरी मश्जिदमा नियमित रुपमा आउन थाल्यो । यो देखेर मानिसहरु डराएका थिए । यो हमलापछि हामी र अर्को समुदायबीचको विश्वासको वातावरण कम भएको छ ।’’
यो मश्जिदको उपयोग प्रतिबिन्धित कट्टरपन्थी संगठन तौहीद जमातका सदस्यले गर्ने गरेका थिए । सोही समूहले नै गएको अप्रिल महिनामा श्रीलंकामा आक्रमण गरेको ठानिएको छ । इस्टरमा आक्रमणपछि श्रीलंका सरकारले तौहीद जमातलाई लक्षित गरेर कारवाही गर्न थालेको छ । यो संगठनको तर्फबाट पूर्वी शहर कट्टनकुडीमा एक मश्जिद चलाउने काम भइरहेको थियो जसलाई अहिले सिल गरिएको छ ।
सो मश्जिद अति रुढीबादी समूहद्वारा सञ्चालन गरिएको थियो । तर उसको यो हमलामा कुनै सम्बन्ध थिएन । यो कदमबारेमा जानकारी पाउनासाथै चरमपन्थीबाट छुट्कारा पाउनका लागि मश्जिद भत्काउने काम गरिएको हो । अकबरका अनुसार उनीहरुको इलाकामा पहिले नै एक मश्जिद रहेको थियो । जसमा मानिसहरु नमाज पढ्थे । केही वर्ष अघि मानिसहरुले सो मश्जिद बनाएका हुन् ।
गएको मे महिनामा पुरानो मश्जिदको एक सदस्यले एक बैठक बोलाएका थिए ।
जसमा विवादको जडको रुपमा रहेको सो मश्जिदलाई भत्काउने निर्णय भयो । स्थानीयले हातमा हथौडा लिएर त्यसलाई भत्काएका थिए । लगभग ७० प्रतिशत श्रीलकाका मानिस बौद्ध धर्म मान्छन् । उनीहरु सिंहली भाषा बोल्ने गर्दछन् । १२ प्रतिशत हिन्दु रहेका छन् । १० प्रतिशत मुसलमान र ७ प्रतिशत इसाइ रहेका छन् । अहिले श्रीलंकामा २५९६ मश्जिद दर्ता गरिएका छन् । अन्य केही मश्जिद दर्ता नगरीपनि चलिरहेको र त्यसमा के भइरहेको छ भन्ने बारेमा नखुलेको बताइएको छ । (बीबीसी)