उपसमितिले टुंग्‍यायो सूचना प्रविधि विधेयक, कांग्रेस सांसदको असन्तुष्टि 

उपसमितिले टुंग्‍यायो सूचना प्रविधि विधेयक, कांग्रेस सांसदको असन्तुष्टि 

काठमाडौं । सूचना प्रविधि सम्बन्धमा व्यवस्था गर्न बनेको विधेयकबारे गठित उपसमितिले प्रतिवेदन तयार पारेको छ । सांसद बिना कुमारी श्रेष्ठको नेतृत्वमा गठित समितिले बुधबार प्रतिवेदनलाई पास गरेको हो ।

संसदको विकास तथा प्रविधि समितिले २०७५ साल चैत १८ गते गठित उपसमितिको १६ औं बैठकबाट प्रतिवेदन तयार पारेको हो । उपसमितिले पास गरेको प्रतिवेदन पूर्ण समितिमा पेश हुनेछ ।

प्रतिवेदनले सूचना प्रविधिको विकास र त्यसबाट आउन सक्ने जोखिम न्यूनीकरणमा सचेत हुने व्यवस्था मिलाएको संयोजक श्रेष्ठले बताइन् । उक्त प्रतिवेदनमा नेपाली कांग्रेसका सांसद बहादुरसिंह लामाले असन्तुष्टि व्यक्त गरेका छन् ।

प्रतिवेदनमा आफ्नो केही असहमित रहेको लामाले बताए पनि कुन-कुन बुँदा र व्यवस्थमा असहमति हो भन्नेबारे बैठकमा खुलाएनन् । विधेयकको ५५ वटा दफामा २७ सांसदले संसोधन प्रस्ताव हालेका थिए ।

अनिल झा, इन्दु शर्मा, केदार सिग्देल, राजेन्द्र लिङदेन, गौरीशंकर चौधरी, मिनाक्षी झा र प्रभु शाह सदस्य रहेको उपसमितिको बैठकमा सञ्चारमन्त्री गोकुल बाँस्कोटाले दुईपटक सहभागी भएर सांसदहरुका राय, सुझाव सुनेका छन् ।

सामाजिक सञ्जाल दर्ता, समाजिक सञ्जालमा जथाभावी लेख्नेलाई कारबाहीलगायतका विषय समेटिएको विधेयकको चर्को विरोध हुँदै आएको थियो । संयोजक श्रेष्ठले उपसमितिले तयार पारेको प्रतिवेदनले सबैका माग सम्बोधन गरेको बताएकी छन् ।
 

प्रतिकृया दिनुहोस
ad