काठमाडौं । सरकारले असार १ गतेबाट उपत्यकामा बिहान ८ बजेदेखि बेलुका ७ बजेसम्म सबै प्रकारका मालबाहक सवारी साधन सञ्चालनमा रोक लगाएको छ ।
यातायात व्यवस्था विभागका महानिर्देशक कुमारप्रसाद दहालको संयोजकत्वमा विभागमा हालै बसेको बैठकले यस्तो निर्णय गरेको हो । “ट्राफिक व्यवस्थापनलाई सहज बनाउन असार १ गतेबाट बिहान ८ बजेदेखि बेलुका ७ बजेसम्म काठमाडौं, ललितपुर र भक्तपुरका मुख्य क्षेत्र तथा चक्रपथभित्र र बाहिर मालबाहक सवारी चल्नमा रोक लगाउने निर्णय भएको छ,” विभागका महानिर्देशक दहालले भने ।
विभागको निर्णयअनुसार उक्त नियम कार्यान्वयन गराइने महानगरीय ट्राफिक प्रहरी महाशाखाका प्रमुख, एसएसपी बसन्त पन्तले बताए । उपत्यकामा टिपरको सञ्चालनलाई व्यवस्थित गर्न सरकारले २ वर्षअघि टिपरलाई मात्र यो नियम लागु गर्दै आएको थियो ।
विभागको अहिलेको निर्णयले सबै प्रकारका मालबाहक सवारी साधनलाई असार १ गतेबाट उपत्यकामा बिहान ८ बजेदेखि बेलुका ७ बजेसम्म सञ्चालनमा रोक लगाएको हो । "अत्यावश्यक सामग्री ढुवानी गर्ने, कुटनीतिक नियोगका र अन्तर्राष्ट्रिय हवाइ ढुवानीसम्बन्धी मालबाहक सवारी साधन यथावत चल्न पाउने छन्,” महानिर्देशक दहालले भने ।
टाटामोबाइल, पिकअप, मिनीट्रक, ट्रक, लहरी र कन्टेनर आदि सबै मालबाहक सवारी साधनहरुलाई उक्त समयमा सञ्चालनमा रोक लगएको हो । उपत्यकामा यो नियम लागु भएसँगै उपत्यका भित्रिने मुख्य नाकाहरुको ट्राफिक जाम केही कम हुने महानगरीय ट्राफिक प्रहरी प्रभाग कलंकीका प्रहरी निरीक्षक केशवराज भट्टले बताए ।
“ट्राफिक जाम कम गर्नका लागि यो नियम लागु गरिएको हो । यसका साथै हाइस्पिड र स्लो मोसनका गाडी एकैसाथ चल्दा हुने अव्यवस्थित ट्रफिकलाई पनि यो नियमले व्यवस्थित गर्ने छ,” महानिर्देशक दहालले बाह्रखरीसँग भने, “यो नियमले यातायात क्षेत्रमा काम गर्ने सबैलाई रात्रीकालीन समयमा रोजगारी बढाउने छ ।”
