काठमाडौं । विश्व कप क्रिकेट २०१९को सबैभन्दा रोचक दिन आजै हो । किनकि, आज आइतबार पाकिस्तान र भारत आमनेसामने हुँदैछन् । राजनीतिक रुपमा यी दुई छिमेकीबीचको सम्बन्ध निकै चिसिएको छ ।
पछिल्लो पटक काश्मिरमा भएको अप्रिय घटनाले यी दुई देशको सम्बन्ध शङ्कामा चलेको छ । शुक्रबार किर्गिस्तानको बिस्केकमा भएको सङ्घाई सहयोग सङ्गठन (एससीओ) शिखर सम्मेलनमा भारतीय प्रधानमन्त्री नरेन्द्र मोदी र पाकिस्तानी समकक्षी इमरान खान भेट हुँदा हातसमेत मिलाएनन् । यस्ता चिसिँदा घटनाक्रमले विश्व कप खेलमा पार्न सक्ने प्रभावका कारण पनि भारत–पाकिस्तानको यस पटकको खेल निकै रोमाञ्चक मानिएको छ ।
भारत–पाकिस्तानबीच क्रिकेट प्रतियोगिता कुनै विश्वकप हो, या अन्य कुनै प्रतिष्पर्धा ? यी दुई देशबीचको खेलमा यिनका प्रशंसकहरुले नतिजालाई आधार मान्दै हार्नेलाई भिलेन र जित्नेलाई हिरो मान्नेछन्, त्यो पनि लामो समयसम्म ।
वर्षाको डर
यो एउटा रोमाञ्चक म्याच हो । त्यसका निम्ति मञ्च पनि तयार भइसकेको छ । र, प्रशंसक या दर्शक उक्त म्याच हेर्नका लागि धैर्य गरिरहेका छन् । यतिखेर यी क्रिकेटप्रेमीहरुलाई एउटा डरले सताउन थालेको छ । आजको म्याचलाई कहीँ पानी परेर नरोकिदेओस् ! यसअघिका केही म्याच पानीका कारण रोकिइसकेकाले पनि यो आशङ्का जीवित रहन पुगेको हो ।
यस पटकको चार वटा म्याचमा पानीले असर गरिसकेको छ । भारत र न्युजिल्यान्डको म्याच पानीका कारण रोकिएको थियो । भारत–पाकिस्तान म्याचको अघिल्लो दिन अर्थात् शनिबार ठूलो वर्षा भयो । अहिले पिचलाई पूरै कभरले छोपिएको छ ।
मौसमले साथ दिएमा आज आइतबार पुनः दुई देशबीचको खेल हुनेछ र कोही भिलेन त कोही हिरो बन्न पाउनेछन् । खेलाडीका निम्ति हरेक म्याच उत्तिकै महत्वको हुन्छ । तर यो म्याच भने विशेष हुन पुगेको छ । काश्मिरको पुलवामा हमलापछि भारतले पाकिस्तानसँग कुनै पनि क्रिकेट म्याच खेल्न हुन्न भन्ने आवाज उठिरहेको थियो । विश्वकप पनि खेल्न हुन्न भन्ने आवाज थियो । विश्वकप जतिजति नजिक आउँदै गयो, उतिउति बहिष्कारको नारा फितलो हुँदै गयो र दुर्ई देश आमनेसामनेका निम्ति तयार भए ।
भारतीय फ्यानहरु चाहन्छन्, टिम इन्डियाले पाकिस्तानविरुद्ध आफ्नो शतप्रतिशत रेकर्ड कायम राख्नुपर्छ । भारतले अहिलेसम्म पाकिस्तानसँग ६ वटा विश्वकप खेल्यो र सबैमा जित हात पार्यो । यस पटकको म्याचलाई लिएर सोसल मिडियामा निकै चर्चा चलिरहेको छ । दुवै देशका प्रशंसकहरुका निम्ति यो म्याच अहम् बन्न पुगेको छ । आजको म्याचको टिकेट ब्ल्याकमा समेत बिक्री भइरहेको बताइएको छ ।
विगत हेर्दा भारतले पाकिस्तानविरुद्ध एकतर्फी जित हासिल गरेको छ । खेल हो, सधैं एउटै नतिजा आउँछ नै भन्न सकिन्न । भारतका शिखर धवन चोटग्रस्त भएका कारण टिम इन्डियाले ओपनिङ र मिडल अर्डरमा परिवर्तन गर्नुपरेको छ । केएल राहुलले ओपनिङ गर्ने भएका छन् । रोहित शर्मा र राहुलले कहिल्यै पनि वान डेमा एकसाथ ओपनिङ गरेका छैनन् । आजको दबाबयुक्त म्याचमा यो नयाँ जोडी कत्तिको जम्ला, हेर्न बाँकी नै छ । पाकिस्तानी मोहम्मद आमिर र वहाब रियाजको खेल कौशलका अघिल्त्तिर राहुल–शर्माको जोडीको परीक्षा आजै हुनेछ ।
दुई देशबीच कुशल सम्बन्ध बनोस् र युद्धका बाछिटा बन्द होऊन् भनी कामना गर्ने देशको कमी पनि छैन । खेल होस् या अन्य कुनै साङ्गठनिक कार्य, भारत–पाकिस्तानबीच सम्बन्ध सुमधुर बनोस् भन्ने चाहना धेरैको रहँदै आएको छ । खेल कूटनीतिले पनि दुई देशबीचको सम्बन्धमा सुधार ल्याउन सक्ने कतिपय खेल विश्लेषक बताउँछन् । भारत–पाकिस्तान दुवै सम्मिलित दक्षिण एसियाली सहयोग सङ्गठन (सार्क) शिखर सम्मेलन लामो समयदेखि हुन सकिरहेको छैन । भारत–पाकिस्तानबीच चिसिँदो सम्बन्धकै कारण सार्क मृतप्रायः हुन पुगेको हो ।
सार्कलाई लिएर नेपाललगायत यसका अन्य सदस्य मुलुक निकै चिन्तित हुन पुगेका छन् । यी दुवै देश सदस्य रहेको एससीओको हालै सम्पन्न शिखर सम्मेलनले पनि सम्बन्ध सुधार्न नसकेकोमा चिन्ता थपिएको छ । हेरौं, यस पटकको विश्वकप क्रिकेटले दुई देशको सम्बन्धलाई थोरै भए पनि सुधार्ला कि !
भारतका सम्भावित ११
रोहित शर्मा, केएल राहुल, विराट कोहली (कप्तान), विजय शङ्कर, महेन्द्र सिंह धोनी, केदार जाधव, हार्दिक पाण्ड्या, भुवनेश्वर कुमार, कुलदीप यादव, यजुवेन्द्र चहल र जसप्रित बुमराह
पाकिस्तानका सम्भावित ११
इमाम उल हक, फखर जमाँ, बाबर आजम, मोहम्मद हफिज, सरफराज अहमद (कप्तान), सोयब मलिक, आसिफ अली, हसन अली, बहाव रियाज, सादाब खान र मोहम्मद आमिर
(एजेन्सीको सहयोगमा)