काठमाडौं । कर्णाली नदीमा जिप खस्दा कम्तीमा १० जना यात्रु बेपत्ता भएका छन् । प्रहरी प्रवक्ता डीआईजी विश्वराज पोखरेलका अनुसार अझै जिप फेला पार्न सकिएको छैन । जिप बाटोबाट ४० मिटर तल नदीमा खसेको हो ।  

हुम्लाको खार्पुनाथ गाउँपालिका–५ को खार्पुनाथबाट सदरमुकाम सिमकोट जाँदै गरेको लु १ ज ७१६६ नम्बरको जिप याङ्चु भन्ने स्थानबाट कर्णाली नदीमा खसेको हो । प्रहरीको प्रारम्भिक अनुसन्धानअनुसार जिपमा एकै परिवारका सदस्य र आफन्तमात्रै रहेको हुनसक्ने सम्भावना छ । जिपमा खार्पुनाथ गाउँपालिकाकी उपाध्यक्ष सिन्धु हमाल मल्ल सवार रहेको खुलेको डीआईजी पोखरेलले बताए ।

नेपाली सेना, नेपाल प्रहरी, सशस्त्र प्रहरी बल र स्थानीय बासिन्दाको प्रयासमा खोजी तथा उद्धार कार्य भइरहेको छ । खोजी कार्यका लागि नेपाली सेनाको टोली टोली परिचालन गरिएको छ ।