एजेन्सी । ब्राजिलका स्टार खेलाडी नेयमार फेरि चर्चामा छन् । कारण स्पेनिस महारथी क्लब बार्सिलोनाले यसै समर सिजनमा उनलाई भित्र्याउने कसरत पुनः गर्न थालेको छ ।
नेयमार सन् २०१७ मा विश्व कीर्तिमानी मूल्य २२२ मिलियन युरोमा फ्रेन्च क्लब पेरिस सेन्ट जर्मेन (पीएसजी) मा अनुबन्धन भएका थिए । बार्सिलोनामा रहँदा निकै चर्चामा आएका नेयमार पीएसजीमा पुगेपछि चर्चा कम भएको थियो । चर्चा कम हुनुको कारण कहिले खेलमा उत्कृष्ट प्रदर्शन नहुनु त कहिले खेलमा चोटका कारण मैदान बाहिर रहनु हो ।
यसरी नै उनले पीएसजीमा लामो समय बिताइरहेका छन् । नेयमार पीएसजी गएयता ठूला खाले अवार्डको मनोनयनमा पनि पर्न सकेका छैनन् । २७ वर्षीय नेयमारलाई बार्सिलोनाले नयाँ सिजनअघि नै केही खेलाडीसहित रकम थपेर फर्काउन लागेको चर्चा चल्न थालेको छ ।
नेयमारलाई बार्सिलोनामा फर्काउन कप्तान लियोनल मैस्सीले नै कसरत गरिरहेको चर्चा हुन थालेको छ । बार्सिलोनाका समर्थकहरुले नेयमारलाई फर्काउने विषयमा भने फरक मत राखेका छन् । उनलाई बार्सिलोनाको घरेलु मैदानमा पुनः भित्र्याउने कुरामा स्पेनिस पत्रिका ‘मुन्डो डेपोर्टिभो’ले गरेको सर्वेक्षणमा बार्सिलोनाका धेरै समर्थकले नेयमार नभित्र्याउने विषयमा मतदान गरेका छन् ।
यदी बार्सिलोनाले नेयमारलाई घरेलु मैदानमा भित्र्याउनु परेमा उसका ठूला खेलाडीहरुलाई बेच्नु पर्ने अवस्था आउने निश्चित छ । नेयमारलाई फर्काउने विषयमा गरिएको पोलमा कूल मतदातामध्ये ७१ प्रतिशले नेयमार भित्र्याउनेको विपक्षमा मत दिएका छन् । ती समर्थकहरुले नेयमारले बार्सिलोना छाड्दा आफ्नो समर्थनमा ठेस पुगेको भन्दै नेयमारलाई नभित्र्याउने विषयमा भोटिङ गरेका हुन् ।
नेयमार हाल कोपा अमेरिकाबाट पनि बाहिर छन् । विश्वकप आयोजक राष्ट्र कतारसँग मैत्रीपूर्ण खेल खेल्ने क्रममा उनी घाइते भएका थिए ।
