नयाँ दिल्ली । भारतले अमेरिकी विदेश मन्त्रालयले भारतमा अल्पसंख्यक समुदायलाई अनियन्त्रित भीडले आक्रमण गर्ने क्रम सन् २०१८मा जारी रहेको भन्ने व्यहोराको प्रतिवेदन सार्वजनिक गरेकोमा त्यसको खण्डन गरेको छ । अमेरिकी विदेश मन्त्री माइक पम्पेओले गएको शुक्रबार जारी वाशिङटनमा जारी गरेको धार्मिक स्वतन्त्रता सम्बन्धी विश्वव्यापी रिपोर्टमा भारतको सन्दर्भमा उक्त कुरा उल्लेख गरिएको थियो ।
भारतीय विदेश प्रवक्ता रभीसकुमारले अरुले भारतका जनताको बारेमा भन्न नसक्ने उल्लेख गर्दै भारत लोकतान्त्रिक मुलुक भएको र अल्पसंख्यक लगायत सबै जनताको आधारभूत अधिकार संविधानले नै संरक्षण गरेको जनाएका छन् ।
अमेरिकी विदेशमन्त्री पम्पेओले यही जुन २५ अर्थात् आगामी मंगलबारबाट भारत भ्रमण गर्न लागेको बेलामा भारतीय विदेशमन्त्रालयले अमेरिकी प्रतिवेदनको आलोचना गरेको हो । भारतीय विदेशप्रवक्ताले भारतले आफ्नो धर्म निरपेक्ष परिचयप्रति गौरव गरेको उल्लेख गर्दै यो विश्वकै सबैभन्दा ठूलो लोकतन्त्र भएको र बहुलवादयुक्त समाज भएको जनाएका छन् ।
भारतको संविधानले नै आधारभूत अधिकारको ग्यारेन्टी गरेको समेत दोहोर्याएका छन् ।
(न्यूज १८ बाट)
