ओटावा । क्यानडामा एक महिला यात्रु बिमान ल्याण्ड गरेको घण्टौं पछिसम्म बिमान भित्रै परेकी छन् । ल्याण्ड गरेर सबै यात्रु बाहिर निस्केपछि बिमानको ढोका बन्द गरेर पार्क गरिएको थियो । तर, टिफ्फानी आडम्स नामकी ती महिला भने बिमान भित्र सुतेको सुत्यै भइछन् । एयर क्यानडाको सो बिमान क्युबेकबाट टोरन्टोका लागि उडेको थियो । यो घटना टोरन्टो बिमानस्थलमा भएको हो । घटना यही जुन ९ को हो । आडम्सले घटनाबारेमा सामाजिक सञ्जाल फेसबुकमा लेखेपछि मात्रै अहिले समाचार बन्न थालेको हो ।
उनका अनुसार निदाएका कारण बिमान अवतरण भएको उनले चालै पाइनन् । जब उनी उठिन त्यतिबेला बिमानभित्र चिसो र अँध्यारो थियो । उनले कम्मरमा भने सिट बेल्ट बाँधेकै थिइन् । बिमान उडेको थिएन । बिमान कम्पनीले त्यस्तो घटना भएको स्वीकार्दै घटनाको बारेमा अनुसन्धान भइरहेको जनाएको छ । आडम्सले जनाएअनुसार बिमान अवतरण भएको केही घण्टापछि मात्रै उनी ब्युँझेकी थिइन् । त्यो अनुभव डरलाग्दो भएको उनले फेसबुकमा लेखेकी छन् ।
ब्युँझेपछि उनले साथी डियन्ना डालेलाई फोन गरेकी थिइन् । एक मिनेटपनि कुरा नगर्दै उनको मोबाइलमा चार्ज सकियो । बिमान पनि बन्द रहेकोले उनले मोबाइल चार्ज गर्न पाइनन् । त्यसपछि उनकी साथी डालेले टोरन्टो पियर्सन बिमानस्थमा फोन गरेर आडम्सको बारेमा सोधपुछ गरिछन् । त्यसपछि मात्रै पत्ता लागेर आडम्सलाई बिमानबाट बाहिर निकालिएको थियो । सो बिमान कम्पनीले उनलाई होटलमा लगिदिने बताएकोमा उनी सो प्रस्ताव अस्वीकार गरेर घरतिर लागिन् । बिमान कम्पनीले क्षमा माग्न र अनुसन्धानका लागि भन्दै दुई पटक आडम्ससँग सम्पर्क गरेकोसमेत उनले जनाएकी छन् । (बीबीसी)