काठमाडौं ।  आईसीसी एकदिवसीय विश्वकप क्रिकेट अन्तर्गत आज (सोमबार) एक खेल हुदैछ । रोजबल क्रिकेट मैदानमा हुने खेलमा विश्वकपबाट बाहिरिसकेको अफगानिस्तानले बंगलादेशको सामना गर्दैछ ।

दुई टोलीबीचको खेल नेपाली समयअनुसार दिउँसो ३ः१५ मा हुनेछ ।  आजको खेलमा अफगानिस्तान सान्त्वना जितको खोजीमा हुनेछ भने प्रतियोगितामा आफ्नो सम्भावना जिवित राख्न बंगलादेश पनि जितको खोजीमा हुनेछ ।

शनिबार भएको खेलमा उपाधि दाबेदार मानिएको भारतलाई कडा चुनौती दिएको अफगानिस्तान आजको खेलमा उच्च मनोबलका साथ मैदान उत्रनेछ । जारी विश्वकपमा उत्कृष्ट प्रदर्शन गर्ने नसकिरहेको अफगानिस्तानलाई बंगलादेश सहजै पराजित गर्दै विश्वकपमा आफूलाई बलियो बनाउने योजनामा हुनेछ ।

बंगलादेशले पनि जारी विश्वकपमा सन्तोषजनक प्रदर्शन गर्न सकिरहेको छैन । बंगलादेशले खेलेका ६ मध्ये दुई खेलमा जित, एक खेलमा बराबरी र तीन खेलमा पराजित हुँदै ५ अंकसहित अंक तालिकाको छैटौँ स्थानमा छ ।

यता ६ खेल खेलेको अफगानिस्तान जितविहिन हुँदै अंकतालिकाको पुछारमा छ ।