काठमाडौं । पोखरामा सम्पन्न सातौं बिच भलिबलको उपाधि पुरुषतर्फ त्रिभुवन आर्मी क्लब र महिलातर्फ एपीएफको जोडीले जितेको छ । पुरुषतर्फ टिम ‘ए’ का मन बहादुर श्रेष्ठ र दिल कुमार सुनारले जित हासिल गरे । उनीहरुले गण्डकी प्रदेश ‘बि’ टिमका राजु बिक र अर्जुन दर्लामी मगरलाई पराजित गर्दै उपाधि हासिल गरेका हुन् ।
पहिलो सेटमा २१–१६ को जित निकाल्न सफल भएको आर्मीले दोस्रो सेट भने गुमायो । दोस्रो सेटमा गण्डकी प्रदेशले २१–१८ को जित निकाल्यो । अन्तिम सेटमा भने आर्मीले १८–१६ को जित हासिल गर्याे ।
यस्तै छैटौं बिच महिला भलिबलको उपाधि एपीएफ ‘ए’ टिमका बिनिता बुढाथोकी र नेबिका चौधरीको जोडीले हात पारेको छ । फाइनल खेलमा नेपाल पुलिस ‘ए’ टिमका निता शाह र कोपिला उप्रेतीको जोडीलाई २१–१३, २१–१३ को सोझो सेटमा हराउँदै उपाधि उचालेका हुन् ।
विजेता टिम तथा खेलाडीले उपाधिसँगै प्रथम नगद पुरस्कार राशि ३० हजार, दोश्रोले २० हजार र तेश्रो हुने टिम तथा खेलाडीले १० हजारका साथ कप, मेडल र प्रमाणपत्र प्राप्त गरे । प्रतियोगितामा एपिएफ ए टिमकी खेलाडी बिनिता बुढाथोकी र पुरुषतर्फ नेपाल आर्मी ए टिम दिल कुमार सुनार उत्कृष्ट खेलाडी घोषित हुँदै नगद ३–३ हजारका साथमा प्रमाणपत्र प्राप्त गरे ।
कास्की जिल्ला भलिबल संघको आयोजनामा यही असार ५ गतेबाट शुरु भएको प्रतियोगितामा सात प्रदेश र विभागिय टिमसहित १७ पुरुष र १४ महिला टिम गरी कुल ३१ टिमको सहभागिता रहेको थियो ।
तस्बिरः केशव पाठक
