काठमाडौं । वर्षा लागिसक्दा पनि बाटो बनाउन पहल नगरेका भन्दै साँखुमा नेपाल कम्युनिस्ट पार्टी (नेकपा) का वरिष्ठ नेता माधवकुमार नेपाल स्थानीयबाट घेरिएका छन् ।
सोमबार शंकरापुर नगरसभाबाट फर्कने क्रममा पूर्वप्रधानमन्त्रीसमेत रहेका नेपाल आक्रोशित स्थानीयबाट घेरिएका हुन् । आक्रोशित स्थानीयबासीले नेता नेपाललाई घेर्दै ‘हामीले कतिञ्जेल दुःख पाउने ?’, ‘बाटो बनाउन पहल गर्नुपर्दैन ?’ भन्दै प्रश्न गरेका थिए ।
नेता नेपालले जनताको पीरमर्का सुन्नुको सट्टा हतारहतार गाडीमा फर्किएको स्थानीयको भनाइ छ । “बाटो पिच नहुँदा झण्डै चार वर्षदेखि काठमाडौं पूर्वका बासिन्दाले सास्ती पाउँदै आएका थिए । यही क्षेत्रको प्रतिनिधि भएकाले हिसाबले उहाँले ठेकेदारलाई पटकपटक ध्यानकर्षण पनि गराउनुभएको हो । यही विषयमा केही झुण्डले उहाँलाई घेरेका हुन्,” शंकरापुर नगरपालिकाका मेयर सुवर्ण श्रेष्ठले बाह्रखरीसँग भने ।
“कार्यक्रममा प्रमुख अतिथिका रूपमा निम्त्याइएका नेता नेपालले बाटो बनाउन पहल गरिरहेको छु भन्नुभएको थियो । ठेकेदारसँग कुरा भइरहेको छ । वर्षाअघि खाल्डा भने पनि पुर्न लगाउँछु भनेर भन्नुभएको थियो । तर, कहाँबाट झुण्ड आएर उहाँको बाटो छेक्यो,” श्रेष्ठको भनाइ थियो ।
उनले बिहेबटुलोमा बोलाउँ दासमेत आउने विकासप्रिय नेतालाई अनाहकमा झुण्डले घेरेको भन्दै दुःख व्यक्त गरे ।
“बाटोको समस्याबाट स्वयम् नेपाल प्रताडित हुनुहुन्छ । उहाँले सदनमा समेत आवाज उठाउनुभयो । तीन चारपटक अनुगमनमा समेत आउनुभयो । अहिले पनि ताकेता गरिरहनुभएको छ । उपत्यका सडक विस्तार आयोजनालाई ध्यानाकर्षण गराइरहनुभएको छ, ठेकेदारलाई झक्झक्याइ रहनुभएको छ,” श्रेष्ठ थप्छन् ।
स्थानीयले भने नेपालले पहलै नलिएको आरोप लगाउँदै आएका छन् । बौद्ध, जोरपाटी, थलीबासीले पनि आवागमनै ठप्प पारेर विरोध गर्दै आएका छन् ।
छेउमा पर्ने भएकाले बन्द गरेर पनि समस्या समाधान नहुने भएकाले नेताको ध्यानाकर्षण गराउनुपरेको उनीहरूको भनाइ छ ।
राससबाट समाचार हटाइयो
‘सडक बनाउन माग गर्दै साँखुबासीले नेताको बाटो छेके’ शीर्षकमा राष्ट्रिय समाचार समितिले समाचार प्रकाशन गरेको थियो । तर, राष्ट्रिय समाचार समितिको वेबपेजमा हालिएको उक्त १६ नम्बरको समाचार राससले तुरुन्तै हटायो ।
समाचार काठमाडौंका उत्तरपूर्वी भेगमा संवाददाता आदित्य दाहालले तयार पारेका थिए ।
यस्तो थियो समाचार
सडक बनाउन माग गर्दै साँखुबासीले छेके नेताको बाटो