काठमाडौं । गोर्खा ब्रुअरीले देशभरका तीन सय बार स्टाफलाई बियर उत्पादन, वियर भण्डारण तथा गुणस्तरीय सर्भिङको तालिम दिएको छ । कम्पनीले उपभोक्तालाई गुणस्तरीय बियर स्वाद अनुभव गराउनका लागि बियर सर्भ गर्नेहरुको क्षमता अभिवृद्धि गरेको हो ।

कम्पीले सिल्भर माउन्टेन स्कुल अफ होटल म्यानेजमेन्टसँगको सहकार्यमा तालिम दिन थालेको हो । तालीममा सहभागीलाई बियर उत्पादनदेखि भण्डारण र सर्भिङसम्मको बारेमा सम्पूर्ण जानकारी गराइन्छ । तालीममा सहभागीले बियर बन्नका लागि आवश्यक सामाग्री, उत्पादन प्रक्रिया, प्रकार आदिबारे पनि सिक्न पाउँछन् । साथै बियर भण्डारण गर्नुपर्ने उचित तरिका, ग्लास सफा गर्ने तरिकाबारे पनि सिकाइन्छ । 

कम्पनीले सो तालीम कार्यक्रमको नाम ‘एक्सबियरियन्स’ दिएको छ । जसमा सहभागीले कार्ल्सबर्ग बियर एकेडेमिको पाठ्यक्रमअनुसार बियरबारे ज्ञान पाउँछन् । गोर्खा ब्रुअरीले कार्ल्सबर्ग बियर एकेडेमिको अन्तराष्ट्रिय कोर्स नेपालमा दिइएको दाबी गरेको छ । तालीममा एक सातामा २० बार स्टाफहरु सहभागी हुने गरेका छन् ।

सोही तालिम कार्यक्रमको एड्भान्स कोर्सको रुपमा कम्पनीले कार्ल्सबर्ग बियर एकेडेमीकी प्रशिक्षक सिग्रिड स्ट्रेटवर्नलाई नेपाल ल्याएको थियो ।सो तालीम कार्यक्रम उनले दिएको सो तालीम कार्यक्रमको नाम ‘बियर इन्थुसियास्ट ट्रेनिङ’ हो । कम्पनीले सो कार्यक्रममा सहभागी बार स्टाफ तथा विभिन्न रेस्टुरेन्टका सञ्चालकलाई ‘बियर इन्थुजियास्ट’को प्रमाणपत्र दिएको छ ।

कम्पनीले यस किसिमको कार्यक्रमका माध्यमबाट बार स्टाफको दक्षता विकास तथा सुधार गर्ने लक्ष्य लिएको छ । यसका कारण उनीहरुले सर्भ गर्ने तरिका अन्तरराष्ट्रिय स्तरको हुने कम्पनीको दाबी छ । गोर्खा ब्रुअरीले आगामी दिनमा सबै सहभागीलाई बियर र हस्पिटालिटिको अन्य विषयमा ज्ञान दिने योजना बनाएको छ ।

“नेपालको बार स्टाफको सीप विकास गरी वियर उपभोक्तालाई बियरको वास्तविक अनुभव लक्ष्यअनुसार यो कार्यक्रम सुरु गरिएको हो ” गोर्खा ब्रुअरीका मार्केटिङ डाइरेक्टर बैभव शर्माले बाह्रखरीसँग भने । उनको अनुसार गोर्खा ब्रुअरीजस्तो प्रिमियम गुणस्तरको बियर उत्पादन कम्पनीका लागि सही अनुभव एदमै अपरिहार्य छ । उनले यो कार्यक्रमबाछ राम्रो फिडब्याक मिलेकोले यसलाई अझै ठूलो बनाउने हौसला मिलेको बताए ।

उनका अनुसार कतिपय आउटलेटले आफ्नै आउटलेटमा आएरु यस्तो ट्रेनिङ दिन आग्रह गरेका छन् । शर्माले भने, “एकपटकको तालीम भन्दा पनि हामी दिन दिनै उहाँहरुलाई ज्ञान र सीप सुधार्नेमा तत्पर छौं ।” गोर्खा ब्रुअरिले तालीम लिएका सबै स्टाफसँग् सम्पर्कमा रहेर नियमित रुपमा ज्ञानको स्तरलाई अपडेट गर्दै लाने योजना बनाएको छ ।

सो तालीममा सहभागीता जनाएका आइरिस पबका व्यवस्थापक गोपाल मिश्रले यस्तो किसिमको तालीमले बियर सर्भिस प्रतिको धारणा नै बदलेको बताए । उनले भने, “तालीमका क्रममा बियरको सामान्य परिचय, इतिहास, अल्कोहल प्रतिशत, प्रकार आदिका बारेमा जान्ने मौका पायौं । बियर बन्न कच्चा पदार्थ तथा स्टोर गर्ने सही तरिका पनि सिक्न पायौं ।”
यसका अतिरिक्त ग्लास कसरी सफा गर्ने ? कसरी ग्लासमा हाल्ने ? कति फिँज निकाल्ने ?  कसरी सर्भ गर्ने ? आदि पनि सकेको बताए । उनले भने, “बियरको फाइदा जानियो, बियर सुद्ध पेय पदार्थ रहेछ भन्ने अनुभुति भयो । बियर बिग्रिने कारण पनि जानकारी पाएँ ।”

उनले आफू हस्पिटालिटि क्षेत्रमा लागेको १५ वर्षमा बल्ल आएर बियरको बारे बुझेको बताए । भने, “गोर्खा ब्रुअरीले सराहनीय कार्य गरेको छ । तालीमको क्रममा सिकेको कुरा बार स्टाफले व्यवहारमा लागू गरे उपभोक्राले बियरको रियल टेस्ट अनुभव गर्न पाउँछन् ।”

गोर्खा ब्रुअरीले आफ्नो योजनाअनुसार यस किसिमको तालीम देशैभर आयोजना गर्ने बताएको छ । यसलाई थप प्रभावकारी बनाउने लक्ष्यसहित कम्पनीले सन् २०१९ को अन्त्यसम्म १ हजार जनालाई र अर्को वर्ष २ हजार बार स्टाफलाई तालिम दिनेछ ।