काठमाडौं । खानेपानी मन्त्री बिना मगरले नेपाली युवा खेलाडीहरुको सही ढंगले संरक्षण र व्यवस्थापनमा ध्यान दिनुपर्ने बताएकी छन् ।
कञ्चनपुरको महेन्द्रनगरमा महाकाली स्पोर्ट्स सोसाइटीले आयोजना गरेको प्रधानमन्त्री महिला कप टी २० क्रिकेट प्रतियोगिताको समापन समारोहलाई सम्बोधन गर्दै खानेपानी मन्त्री मगरले खेलाडीहरुको संरक्षण र व्यवस्थापनमा सबैको ध्यान जानुपर्ने बताएकी हुन् ।
“खेलकुदले राष्ट्रिय र अन्तर्राष्ट्रिय जगतमा नेपाललाई चिनाउने भएकाले खेलाडीहरुको संरक्षण गर्नु जरुरी छ । खेल भनेको केबल मनोरञ्जनका लागि मात्रै होइन यसले युवाहरुमा आत्मविश्वाससमेत जगाउँछ,” कार्यक्रमलाई सम्बोधन गर्दै मन्त्री मगरले भनिन्, “सक्षम र अनुशासित युवा जन्माउन खेलकुद क्षेत्रको विकास गर्नु अति आवश्यक छ ।”
सुदूरपश्चिम क्षेत्रमा यसरी राष्ट्रिय स्तरको महिला क्रिकेट प्रतियोगिता हुनु आफैंमा महत्वपूर्ण उपलब्धि रहेको भन्दै यस किसिमको प्रतियोगिता निरन्तर हुनुपर्ने मन्त्री मगरले बताइन् ।
मन्त्री मगरले सुदूरपश्चिम क्षेत्रमा खेलकुदको विकासको लागि आफुले सक्दो सहयोग गर्ने प्रतिवद्धता व्यक्त गरिन् ।
सुदूरपश्चिम सरकारका उद्योग, वन तथा वातावरण, पर्यटन राज्य मन्त्री प्रकाश रावलले सुदुर पश्चिम क्षेत्रमा खेलकुदको विकासका लागि अन्तर्राष्ट्रियस्तरको रङ्गशाला बनाउन गुरुयोजना तयार भइरहेको जानकारी दिइन् ।
असार ४ गतेदेखि सुरु महिला क्रिकेट प्रतियोगिताको फाइनल खेल सशस्त्र प्रहरी टीम र सुदूरपश्चिम क्लबबीच भएको हो । प्रतियोगितामा सशस्त्र प्रहरी टीमले सुदूरपश्चिम टीमलाई ६ विकेटले पराजित गरेको छ ।
सुदूरपश्चिम टीमले २० ओभरमा ७१ रनमात्र बनाएको थियो । मन्त्री मगरले विजयी टीमलाई प्रमाणपत्र र पुरस्कार वितरण गरेकी थिइन् ।