वाशिङटन । संयुक्त राज्य अमेरिकाले आउँदो आइतबारदेखि आफ्नो देशमा भएका अवैध आप्रवासीहरुलाई धपाउन शुरु गर्ने भएको छ । अमेरिकी इमिग्रेसन एण्ड कस्ट्युम्स इन्फोर्समेन्ट अपरेसनले हजारौं कागजात नभएका आप्रवासीलाई पक्राउ गर्न लागेको न्यूयोर्क टाइम्सले जनाएको छ ।
दुई साताअघि राष्ट्रपति डोनाल्ड ट्रम्पले सो कार्यक्रम तय गरेको भएपनि त्यसबारेमा पहिला नै सूचना चुहिएकाले रोकिएको थियो । ट्रम्प प्रशासनको यो कार्यबाट नेपाली पनि प्रभावित हुन सक्नेछन् ।
छापा मारेर आप्रवासीलाई पक्राउ गर्ने र फिर्ता पठाउनेसम्मका काम त्यस अन्तर्गत हुने जनाइएको छ । दुईजना अहिलेका र एक जना पहिलाका होमल्याण्ड सेक्युरिटीका अधिकारीले जनाएअनुसार पहिला लक्षित नगरिएका मानिसपनि अहिले पक्राउ पर्न सक्नेछन् । अन्तिममा भने अपरेसनको शैलीमा केही फेरबदलपनि हुन सक्ने जनाइएको छ । कम्तिमा २ हजार आप्रवासी जसलाई पहिला नै स्वदेश फिर्ता गर्ने भनिएकोमा अहिलेपनि अवैध रुपमा अमेरिकामा नै बस्दै आएको बताइएको छ ।
उनीहरुलाई नै यसपालि लक्षित गर्न लागिएको ती अधिकारीहरुले बताएका छन् । राष्ट्रपति ट्रम्पले गएको जुन २२ देखि यस खालको कडाई शुरु हुने भनेकोमा अमेरिकाका सभामुख नान्सी पेलोसीले सो कार्यक्रम रोक्न आग्रह गरेकी थिइन् । त्यसले गर्दा पनि यो कारवाही पछि सरेको बताइएको छ । (एजेन्सीहरु)