काठमाडौं । केहीदिन अघिसम्म काठमाडौं धुलोले आक्रान्त थियो । तर अहिले काठमाडौं फेरि हिलोले आक्रान्त छ । केहीदिनअघि प्रधानमन्त्री केपी शर्मा ओलीले आफू प्रधानमन्त्री हुँदा काठमाडौंका आधा जनसंख्याले मास्क लगाउने गरेको भए पनि अहिले मास्क लगाएको देख्न मुस्किल हुने बताएपछि चौतर्फी आलोचना भएको थियो ।
तर अहिले उक्त धुलो हिलोमा परिणत भएपछि उपत्यकाबासीले थप सास्ती बेहोर्नुपरेको छ । पछिल्लो दिनमा परेको लगातारको झरीले सडक हिलाम्य भएका छन् । काठमाडौंका उपत्यकाका भित्रि सडकको अवस्था अहिले बेहाल छ । सातदोबाटोदेखि लगनखेल, ढोलाहिटी चापागाउँ–लेले, कमलविनायक–नगरकोटसहित काठमाडौंका भित्रि सडक हिलाम्य छ ।
त्रिपुरेश्वर–कलङ्की–नागढुङ्गा, चावहिल–जोरपाटी–बागमती–साँखु, लगनखेल–सातदोबाटो, इमाडोल–सिद्धिपुर–गोदावरीखोला–लामाटार, ढोलाहिटि–सुनकोठी–चापागाँउ–प्याङगाउँ–लेले–तिलेश्वर–सरस्वतीकुण्ड, कर्मनाशाखोला–हरिसिद्धि–गोदावरीकुण्ड, जोरपाटी–सुन्दरीजल, नक्खुखोला–भैंसेपाटी–बुङ्मति, चक्रपथ–ज्ञानज्योति गणेश–विद्वतमार्ग र मनोहरा पुल–बाखाहा बजार– निकोसेरा खस्याङ खुसुङ पुल सडक आयोजना कार्यालयले चारवर्षदेखि ठेक्कामा लागेको भए पनि अहिलेसम्म विस्तारको काम सम्पन्न हुन सकेको छैन ।
चावहिल–जोरपाटी–बाग्मती–साँखु सडकको भौतिक प्रगति अहिलेसम्म ५० प्रतिशत भएको उपत्यका सडक विस्तार आयोजनाले बताएको छ । १२ किलोमिटर लम्बाइको यो सडक विस्तार डेढ वर्षमा सक्नेगरी २०७२ र २०७४ मा युनाइटेड बिल्डर्स, बज्रगुरु, बिटी, लामा, समानान्तर, जन्मभूमि जेभीले ठेक्का लिएका हुन् ।
विस्तार गर्न खनेर छोडेपछि हिलाम्मे बनेको सडकाबाट घाम लागेपछि धुलोको सास्ती भएपछि सडक तत्काल पिच गर्नका लागि स्थानीयले वैशाख २६ गते बिहीबार बौद्ध र जोरपाटीका स्थानीयले यो सडक तत्काल पिच गर्न सडकमै आन्दोलन गरेका थिए ।
आन्दोलनपछि युनाइटेड विल्डर्सका तर्फबाट शकुन्तललाल हिराचन र स्थानीयबीच १ साताभित्र सडक पिच हुने सहमति भए पनि उक्त सहमति कार्यान्वयन हुन सकेन । सडक चावहिलदेखि चुच्चेपाटीसम्म हिलाम्मे छ । सडकमा मिडियन र लेन नहुँदा ट्रफिक प्रहरीलाई त्यहाँको ट्राफिक व्यवस्थापन गर्न निक्कै समस्या छ ।
चुच्चेपाटीदेखि बौद्ध साढे एक किमि पिच भएको छ । बौद्धमा करिब २०० मिटर सडक ग्राबेल गरिए पनि सडकमा हिलो र धुलोको सास्ती सडक प्रयोगकर्ताले खप्नुपर्ने बाध्यता छ । यस्तै बौद्धदेखि जोरपाटी सडक पनि हिलाम्मे छ । सडकमा रहेको खाल्डामा गाडीहरु फस्छन् । जोरपाटीदेखि नारायणटारसम्म करिब २ किमि सडक पिच भए पनि बौद्ध र साँखुतर्फबाट आउने गाडीको टायरमा टाँसिएको हिलो त्यस क्षेत्रमा उड्दा स्थानीले थप सास्ती बेहोर्नुपरेको छ । जोरपाटी–सुन्दरीजल ७ किमि सडक विस्तारको प्रगति पनि सन्तोषजनक छैन ।
आशिष, सिएम, पप्पु, महालक्ष्मी जेभीले १ वर्षमै विस्तार सम्पन्न गर्ने गरी सडकको ठेक्का ०७३ सालमा लिएका हुन् । तर हाल यी दुवै सडकको अवस्था लथालिङ्ग छ । सडक विस्तारका लागि झिकेका टेलिफोनका तर र इन्टरनेटका केबलहरु सडकमा यत्तिकै छोड्दा सडक प्रयोग थप सकसपूर्ण बनेको छ ।
पानी पर्नासाथ सडक हिलो हुने र घाम लाग्दा त्यही हिलो धुलो बनेर उड्दा स्थानीय पसलमा ग्राहकको चहलपहल कम भएको गोकर्णेस्वर नगरपालिका ५ जोरपाटीका मोबाइल पसल सञ्चालक हितेस चौलागाईं बताउँछन् ।