नयाँ दिल्ली । कतिपय भारतीय विज्ञापनदाताले ठूलो रकम खर्च गरेर आईसीसी वर्ल्डकप क्रिकेटको फाइनल म्याचको विज्ञापन बुक गरेका थिए । अब उनीहरु भन्न थालेका छन्, फाइनलमा भारत नपुग्नाले थुप्रै दर्शक घट्नेछन् । साथै, अन्तिम समयमा बेचिने विज्ञापन स्लट खरिद गर्ने पनि उतिविधि हुने छैनन्, किनकि त्यसको मूल्य अधिक हुने गर्छ । 

मिडिया बायर्स र एड दिने कम्पनीहरु भारत फाइनलमा पुगेको भए धेरै दर्शक हुने, अब भारत बाहिरिएपछि दर्शक आधा हुने बताउँछन् । डब्ल्यूपीपीका सीईओ कपिल अरोडा भन्छन्, ‘‘फाइनल हेर्ने दर्शक यदि कम हुन्छन् भने एडभर्टाइजर्स निश्चित रुपमा निराश हुन्छन् ।’’ 

पोलिसी बजार डटकम यो टुर्नामेन्टको टप एडभर्टाइजर्समध्ये एउटा थियो । कम्पनीका मार्केटिङ प्रमुख साई नारायण भन्छन्, ‘‘भारत फाइनलमा पुग्ने सकेन, यसकारण उक्त म्याचको टीआरपीमा नराम्रो असर परेको छ ।’’ भारतले नौ वटा म्याच खेलेको र राम्रो प्रदर्शन गरेको उनको भनाइ छ । ‘‘यस हिसाबले भने कम्पनीको लगानी सफल रह्यो,’’ नारायणले भने ।

टुर्नामेन्ट एडमा निकै खर्च गर्दै आएको एक फुड एन्ड टेक कम्पनीले भन्यो, ‘‘ब्रान्डका लागि भारत बहिरिनु निराशाजनक कुरा हो । हामी फाइनल म्याचका लागि प्रिमियम रेटमा केही एड स्पट खरिद गर्नेबारे योजना बनाइरहेका थियौं । अब भारत फाइनलमा छैन, यसकारण प्रिमियम रेटमा स्लट खरिद गर्नुको फाइदा केही पनि छैन ।’’

स्टार इन्डियाले आफ्नो स्पोर्टस् नेटवर्कमा सात भाषामा टुर्नामेन्ट प्रसारण गरिरहेको थियो । उसले विज्ञापनबाट करिब १३ सय ५० करोड कमाउने अपेक्षा गरेको थियो । यसपटक आईसीसीले वर्ल्डकपको फर्म्याट पनि बदलेको थियो । सबै टोलीले एकअर्कासँग कम्तीमा एक म्याच खेल्नैपर्ने थियो । भारतले नौ म्याच खेल्यो, जुन पहिलाको तुलनामा ५० प्रतिशत बढी हो । 

ठूल्ठूला विज्ञापनदाताले यस पटकको विश्वकपका लागि टेलिभिजनका साथै ग्राउन्ड स्पोन्सरसिप पनि खरिद गरेका थिए । विज्ञापनदाताहरु टुर्नामेन्टका क्रममा आफ्नो ब्रान्डले पाएको एक्सपोजरबाट खुसी पनि थिए ।

ठूला विज्ञापनदाताहरुका अनुसार विश्वकपबाट ब्रान्डको पहिचान र बिक्री राम्रो भएको छ, तर भारत फाइनलमा नपुग्नु निराशाजनक अवस्था हो । यद्यपि, विज्ञापनदाताहरु आफ्नो लगानीको प्रतिफल प्राप्त भएकोमा खुसी छन् । निराशाचाहिँ के हो भने, न्युजिल्यान्डलाई जितेर भारत फाइनलमा पुगेको थियो भने विज्ञापनको बजार निकै माथि चढ्नेथियो । 

(नवभारत टाइम्स)