दमक–७ स्थित पशुहाट क्षेत्रको जलमग्न सुकुम्बासी बस्ती । तस्बिरः रासस
काठमाडौं । बिहानैदेखि देशका विभिन्न भागमा वर्षा निरन्तर रुपमा भइरहेका कारण बाढी र पहिरोको खतरा देखिएको छ । जल तथा मौसम विज्ञान विभागले विभिन्न नदीमा बाढी पूर्वानुमान गर्दै सतर्क रहन आग्रह गरेको छ ।
प्रहरी प्रधान कार्यालयले संकलन गरेको तथ्यांकअनुसार देशका विभिन्न ठाउँमा बाढीले जनजीवन प्रभावित हुनुका साथै जनधनको क्षति भएको छ । क्ष्ाितको विवरण आउने क्रम जारी छ ।
आज (शुक्रबार) बिहान साढे ११ बजेसम्मको विवरण
कैलालीको भजनी नगरपालिका–५ मा रहेको कान्द्रा नदी बढ्न गई जोखिमको सम्भावना भएपछि सो क्षेत्रमा बसोबास गर्ने १४ घर परिवारका ३५ जनालाई घरमा सुरक्षित स्थानमा सारिएको छ ।
विराटनगर महानगरपालिका–८ स्थित सिंगिया खोलामा बाढी आई उक्त खोलाको डिलमा बसोबास गर्ने सुकुम्बासी बस्तीका ६० घरमा पानी पसेको छ । आँगनमा पानी पसेकोले सोही खोलाको माथिल्लो डिलमा आ–आफ्नो सरसामान सहित सुरक्षित साथ बसेका छन् । उनीहरुलाई ५० थान त्रिपाल वितरण गरिएको छ ।
बूढीगंगा गाउँपालिका–७ डंग्राहा स्थित खदाम खोलाको किनारमा बसोबास गर्ने उराउ र सरदार समूहका १३ परिवारको घरमा पानी पसी बस्न नसक्ने भएकोले १३ घर परिवारका मानिसहरु नजिकै रहेको प्रगतिशिल विद्यालयको पुरानो भवनमा सारिएको छ ।
यस्तै सुन्दरहरैचा नगरपालिका–१ लक्ष्मीपुर स्थित २ वटा घरको भुइँ तलामा आकाशे पानी पसी बस्न नसक्ने अवस्था भएपछि छिमेकीको घरमा बसेका छन् ।
धनकुटाको पाख्रिबास नगरपालिका–७ मा पर्ने माङमाया खहरे खोल्सामा आएको बाढीले धनकुटा–भोजपुर सडक अवरुद्ध भएको छ ।
सप्तरीको तिलाठी कोईलाडी गाउँपालिका–तिलाठी स्थित खाडो खोलामा बाढी आई राजविराजबाट भारतको कुनौली जाने सडक–खण्ड अवरोध भएको छ ।
उदयपुरको कटारी नगरपालिका–१४ स्थित भदौरे खोला, किण्डुक खोला र वनडाँडा खोलामा बाढी आई घुर्मी–कटारी सडक खण्ड अवरुद्ध भएको छ ।
ललितपुरको महाँकाल गाउँपालिका–३ गोटीखेल स्थित खहरे खोलाले बाटो बगाउँदा मकवानपुर–ठिंगन–चापागाउँ (कान्ति लोकपथ)सडक खण्ड अवरुद्ध भएको छ । यस्तै महानगरीय प्रहरी प्रभाग पुल्चोकमा रुख ढल्दा भवनमा क्षति पुगेको छ ।
भोजपुरको राम प्रसाद राई गाउँपालिका–७ बासिखोरा बस्ने जगत बहादुर राईको फुसको छानो भएको १ तले कच्ची घर अगाडिको गाह्रो भत्कदा पिँढीमा सुतिरहेका जगत बहादुर राई पुरिएर मृत्यु भएको छ ।
ललितपुरको बाग्मती गाउँपालिका–३ भट्टेडाँडा देवीस्थान स्थित बा ४ ख ८६४ नम्बरको गाडी गुडिरहेको अवस्थामा माथिबाट ढुंगा खसी सोही गाडीको पछाडि सवार दिपक घलेको टाउकोमा चोट लागि घाइते भएका छन् ।
धनकुटाको चौबिसे गाउँपालिका–२ शुक्रबारे बस्ने वर्ष ३५ का दोर्ण तुम्साको पाली घर पहिरोले बगाउँदा ३ लाख ५० हजार बराबरको क्षति भएको छ ।
पाँचथरको मिक्लाजुङ गाउँपालिका–७ लुवाङदिन बस्ने पदम बहादुर तामाङको ढुंगा माटोले बनेको टिनको छानो भएको १ तले २ कोठे कच्ची घर माथिबाट पहिरो आई उक्त घर आधा भाग बगाएको छ ।
ओखलढुंगाको खिजिदेम्बा गाउँपालिका–५ चुप्लुभञ्याङमा पहिरोले पासाङ शेर्पाको ढुङ्गामाटोले बन्दै गरेको टिनको छानो भएको २ तले घर भत्किएको छ ।
कालिकोटको राष्कोट नगरपालिका–१ का गोरे भण्डारीको २ तले, ४ कोठे टीनले छाएको घरको आँगन भास्सिन गई घर अगाडिको तला माथिको २ वटा कोठा भत्किएको छ ।
काठमाडौंं महानगरपालिका–२१ लगन स्थित बिना शाक्यको ढुंगा माटोले बनेको कच्ची पुरानो घर भत्किएको छ ।
उदयपुरको रौतामाई गाँउपालिका–५ अँधेरी खोला स्थित गाईघाट–खोटाङ भित्रि सडक खण्डमा पहिरो गई बाटो अवरोध भएको छ ।
ओखलढुंगाको मानेभञ्ज्याङ गाउँपालिका–७ भडारे स्थित भडारे खोलामा बाढी आई सिद्धिचरण राजमार्ग अवरोध भएको साथै सोही स्थानमा खोटाङबाट काठमाडौंतर्फ जाँदै गरेको ना ६ ख १४१५ नं.को बस उक्त खोलाको बाटो क्रस गर्ने क्रममा फसेको छ ।
काभ्रेको रोशी गाउँपालिका–११ माम्ती, कालढुंगा,पिप्ले र लाशकोट स्थित बिपि राजमार्गको ४ स्थानमा पहिरो आई बाटो अवरोध भएको छ ।
सिन्धुलीको गोलञ्जोर गाउँपालिका–५ खनियाखर्क र सोलाभञ्ज्याको बीचस्थित बिपि राजमार्गमा माथिबाट पहिरो आई बाटो अवरोध भएको छ । पहिरो झर्ने क्रम जारी रहेको छ । यस्तै सुनकोशी गाउँपालिका–१ कमेरे स्थित बिपि राजमार्गमा पहिरो आई बाटो अवरोध भएको छ ।
मकवानपुरको ईन्द्रसरोवर गाँउपालिका–२ देउराली नजिक जंगलमा पहिरो आई हेटौडाबाट काठमाडौंतर्फ जाँदै गरेको लु १ च ५१५३ नं.को निउरो लोड गरेको बलेरो गाडी लेदो माटोमा चिप्लन गई सडकको छेउमा पुगी बाटो अवरोध भएको छ ।
रामेछापको मन्थली नगरपालिका–६ सेलेघाट स्थित मन्थली–खुर्कोट सडक खण्डमा पहिरो आई बाटो अवरोध भएको छ ।
भक्तपुरको चाँगुनारायण नगरपालिका–६ नगरकोट स्थित जस्ता र फलामले बनेको प्रभाग नगरकोटको ट्रष्ट हावाहुरीले उडाएको साथै कार्यालय प्रयोजनको लागि रहेको कम्प्युटरमा क्षति पुगेको, कार्यालयको कागजपत्रहरू भिजेको, हाल सामानहरू सोही प्रभागको अर्को भवनमा सारिएको छ ।
